अकोला (वृत्तसंस्था) रात्रीभर ड्युटी करून पहाटे घराकडे दुचाकीवर निघालेल्या डॉ. पंजाबराव देशमुख कृषी विद्यापीठाचा कर्मचारी राष्ट्रीय महामार्गावर वणी रंभापूरनजीक कारच्या धडकेत ठार झाल्याची घटना मंगळवार, दि. ९ मे रोजी सकाळी घडली. राजु रामकृष्ण सोनेकर असे अपघातातील मृतकाचे नाव आहे.
डॉ पंजाबराव देशमुख कृषी विद्यापीठ वणी रंभापूर येथील रात्रीच्या ड्युटीवरून राजू सोनेकर हे आपल्या दुचाकी क्रमांक (एमएच ३० बीओ १३२२) ने बोरगाव मंजू येथे जात असताना समोरून येणारी कार क्रमांक (एमएच १९ सीयू ०२९७) ने दुचाकीला धडक दिली. या अपघातात दुचाकीस्वार राजू सोनेकर यांच्या डोक्याला जबर मार लागल्याने त्यांचा जागीच मृत्यू झाला. दरम्यान घटनेची माहिती मिळताच पोलिसांनी घटनास्थळी धाव घेऊन घटनेचा व मृतदेहाचा पंचनामा करून मृतदेह उत्तरीय तपासणीसाठी अकोला येथील शासकीय रुग्णालयात दाखल केला. या घटनेची फिर्याद प्रथमेश सोनेकर यांनी पोलिस ठाण्यात दिली. कारचालक राजेंद्र भावसार (जामनेर) याच्याविरुद्ध गुन्हा दाखल करण्यात आला असून पुढील तपास ठाणेदार संजय खंदाडे यांच्या मार्गदर्शनाखाली पोलिस करीत आहेत.
