अमरावती (वृत्तसंस्था) कौटुंबिक कलहातून पत्नीने पतीचा खून करून पतीने आत्महत्या केल्याचा बनाव रचला होता. परंतु, शवविच्छेदन अहवालावरून सहा दिवसांनी तिचे बिंग फुटले. यानंतर पोलिसांनी तिला तात्काळ अटक केली. नीलेश शंकरराव इंगळे (वय ३५ रा. हंतोडा) असे मृतक तर जया नीलेश इंगळे (वय ३२ रा. हंतोडा), असे अटक करण्यात आलेल्या संशयित आरोपी पत्नीचे नाव आहे.
नीलेश व जया यांच्यात नेहमी कौटुंबिक कारणावरून वाद होता. शुक्रवार, २९ सप्टेंबर रोजीही त्यांच्यात याच कारणावरून वाद सुरु झाला. या वादात जयाने पती नीलेशवर हल्ला चढविला. त्यात नीलेशचा मृत्यू झाला. त्यानंतर जयाने पती नीलेश यांनी राहते घरी अज्ञात कारणावरून गळफास लावून आत्महत्या केल्याचा बनाव करून अंजनगाव सुर्जी पोलिसांना माहिती दिली. पोलिसांनी आकस्मिक मृत्यूची नोंद करून तपास सुरु केला. परंतू मृतक नीलेशच्या शरीरावर रक्ताचे डाग व मारहाणीच्या खूणा दिसून आल्याने पोलिसांना संशय आला.
तर मृतक नीलेशच्या आई-वडिलांनीही मुलाची हत्या करून गळफास लावल्याचा बनाव करण्यात आल्याचा आरोप केला. त्यामुळे पोलिसांचा संशय आणखी बळावला. दरम्यान, शवविच्छेदन अहवालावरूनही जबर मारहाणीमुळे नीलेशचा मृत्यू झाल्याचे समोर आले. नीलेशच्या गुप्तांगावर जबर हल्ला केल्याने खरचटण्याचे व्रण हेच मृत्यूस कारणीभूत असल्याचे शवविच्छेदन अहवालात नमूद करण्यात आले होते.
या प्रकरणी मृतक नीलेशचे वडील शंकरराव त्र्यंबक इंगळे (७०) रा ग्राम हंतोडा यांची तक्रार व शवविच्छेदन अहवालावरून पोलिसांनी बुधवारी आरोपी जया इंगळेविरुद्ध हत्येचा गुन्हा दाखल करून तिला अटक केली. पुढील तपास पोलीस निरीक्षक दीपक वानखडे यांच्या मार्गदर्शनाखाली सहाय्यक पोलीस निरीक्षक विनोद धाडसे करीत आहेत.
