करमाड (वृत्तसंस्था) भरधाव कार चालकाचा गाडीवरील ताबा सुटल्याने झालेल्या भीषण अपघातात कार चालक तरुण जागीच ठार झाला. ही घटना सोमवारी (दि.१५) रोजी मध्यरात्री दीड वाजेच्या सुमारास छत्रपती संभाजीनगर- जालना मार्गावर रामजी हॉटेल जवळ घडली. अभिजित मधुकर वाघमारे (२६, रा. बोरगाव तारू, ता. भोकरदन, जि. जालना) असे मृताचे नाव आहे.
या अपघाताबाबत मिळालेल्या अधिक माहीतीनुसार, सोमवारी (दि.१५) रोजी मध्यरात्री दीड वाजेच्या सुमारास अभिजित वाघमारे हे क्रेटा कार (क्र.) ने जालना येथून छत्रपती संभाजीनगरकडे चालले होते. भरधाव असलेल्या कारचा ताबा सुटल्याने त्यांची कार करमाड शिवारातील रामजी हॉटेलच्या जवळच असलेल्या एका झाडावर जाऊन धडकली. यावेळी झालेल्या भीषण अपघातात वाघमारे हे गंभीर जखमी झाले. यावेळी या रस्त्याने मार्गस्थ असलेल्या लोकांनी अपघाताची माहिती करमाड पोलिसांना दिली.
माहिती मिळताच जगतगुरु नरेंद्राचार्य महाराज रुग्णवाहिकेचे चालक बाळू कातकडे यांनी जखमीला उपचारासाठी घाटी रुग्णालयात दाखल केले असता डॉक्टरांनी जखमी वाघमारे यांना तपासून मृत घोषित केले. मयत वाघमारे यांच्या पश्चात आई, वडील, भाऊ व भाउजयी असा परिवार आहे. अपघाताची नोंद करमाड पोलिसांनी केली आहे. अधिक तपास जमादार शिवाजी मदेवाड, विजयसिंह जारवाल करीत आहेत.
