यवतमाळ (वृत्तसंस्था) पूर्ववैमनस्यातून एकाच कुटुंबातील तिघांवर कोयता, चाकूने सपासप वार करून तिहेरी हत्याकांड घडविण्याचा प्रयत्न झाला. यामध्ये दोघांचा मृत्यू झाला असून, एक गंभीर जखमी आहे. ही घटना पुसद येथील विठाळा स्थित हनुमंत बापू मंदिरालगत २० जुलैच्या पहाटे दीड वाजताच्या सुमारास घडली. दुहेरी हत्याकांडाच्य घटनेने पुसद हादरून गेले आहे. राहुल हरिदास केवटे (४५), क्रिश ऊर्फ सुमित विलास केवटे (२०) अशी मृतांची नावे आहेत. तर बंटी हरिदास केवटे हा गंभीर जखमी आहे.
नेमकं काय घडलं ?
या संदर्भात अधिक असे की, आरोपी गणेश तोकड व अव चव्हाण हे दोघे बुधवारी रात्री १०:३० वाजता केवटे यांच्या घरासमोर आले. त्यावेळी त्या दोघांना घराजवळ बसू नका, असे म्हणताच त्यांनी फिर्यादी नयन अनिल केवटे याच्याशी वाद घातला. दरम्यान, राहुल केवटे, बंटी केवटे, क्रिश केवटे या तिघांनी येऊन हा वाद सोडविला. आरोपी गणेश तोरकड व अवी चव्हाण तेथून निघून गेले जाताना त्यांनी तुम्हाला पाहून घेतो, अशी धमकी दिली. त्यानंतर फिर्यादी नयन केवटे हा घरी परत आला. तेव्हा राहुल केवटे, बंटी केवटे व क्रिश केवटे हे घराच्या ओट्यावर बसून होते. रात्री १ वाजेच्या सुमारास गणेश तोरकड हा त्याचे साथीदार पवन वाळके, नीलेश थोरात, गोपाल कापसे, गणेश कापसे, अवी चव्हाण यांना घेऊन आला. या सर्वांनी कोयते व असल्याने चाकूने एकाच वेळी तिघांवर हल्ला चढविला. त्यात राहुल हरिदास केवटे, क्रिश विलास केवटे हे दोघे गंभीर जखमी झाले. हल्लेखोरांच्या तावडीतून पळण्याचा प्रयत्न करीत असताना बंटी हरिदास केवटे याच्या पाठीवर कोयत्याने वार करण्यात आला.
आरडाओरडा ऐकून परिसरातील नागरिक गोळा !
आरडाओरडा ऐकून परिसरातील नागरिक गोळा झाल्यानंतर हल्लेखोर तेथून पसार झाले. जखमींना शासकीय रुग्णालयात हलविण्यात आले. तेथे डॉक्टरांनी राहुल केवटे व क्रिश केवटे या काका-पुतण्याला मृत घोषित केले. बंटी केवटे याची प्रकृती गंभीर असल्याने त्याला यवतमाळ शासकीय रुग्णालयात दाखल करण्यात आले आहे. या प्रकरणी सहा जणांविरुद्ध वसंतनगर पोलिसात भादंविचे कलम ३०२, ३०७, १४७, १४८, १४९ व आर्म अॅक्टनुसार गुन्हा दाखल करण्यात आला आहे. पोलिसांकडून फरार आरोपींचा शोध घेतला जात नाही, तो पर्यंत दोन्ही मृतदेह पोलीस स्टेशनच्या मुख्य प्रवेशद्वारावर आणून ठेवण्याची भूमिका मृतकांच्या कुटुंबीयासह भीम टायगर सेनेचे जिल्हाध्यक्ष किशोर कांबळे यांनी घेतली. त्यामुळे स्थानिक उपजिल्हा ग्रामीण रुग्णालय व शहर पोलीस स्टेशन ते मुखरे चौकादरम्यान तणाव निर्माण झाला होता.
अंत्ययात्रेला पोलीस संरक्षण !
शहर पोलीस स्टेशनकडे येणाऱ्या दोन्ही मार्गावर राज्य राखीव दलाची तुकडी व पोलीस तुकडी तैनात करून कडक बंदोबस्त ठेवण्यात आला होता. उपविभागीय पोलीस अधिकारी पंकज अतुलकर यांनी २४ तासाच्या आत आरोपींचा शोध घेतला जाईल, असे आश्वासन दिल्याने मृतकाच्या कुटुंबीयांकडून शवविच्छेदनानंतर मृतदेह ताब्यात घेण्यात आले होते. मृतकाच्या घरापासून तर हिंदू मोक्षधामापर्यंत अंत्ययात्रेला पोलीस संरक्षण पुरविण्यात आले होते. दरम्यान, मृतक आणि मारेकरी एकाच परिसरात राहतात. आरोपींना ‘तू इतरांजवळ आमच्या चुगल्या का करतोस’ असं विचारणा केले असता वादास तोंड फुटले होते. शेजाऱ्यांच्या मध्यस्थीने तो वाद मिटला होते. परंतू सहाही आरोपींनी माहूर रोडवर एका धाब्यावर एकत्रित पार्टी करून मद्यप्राशन करीत दिवटे बंधूचा मारण्याचा कट रचला.
