सिडनी (वृत्तसंस्था) ऑस्ट्रेलिया विरुद्ध भारत संघात सुरु असलेल्या ४ सामन्यांच्या कसोटी मालिकेतील तिसरा सामना सिडनी क्रिकेट ग्राऊंड येथे खेळला जात आहे. या सामन्यातील तिसऱ्या दिवशी (९ जानेवारी) भारतीय क्रिकेट संघाने आंतरराष्ट्रीय क्रिकेट परिषदेकडे मोहम्मद सिराज यांच्याबदद्ल वर्णद्वेषी टीका केल्याची तक्रार केली असल्याची माहिती समोर येत आहे.
तिसऱ्या कसोटी सामन्याच्या तिसऱ्या दिवशी सिडनी क्रिकेट ग्राऊंडच्या मैदानावर भारताचा वेगवान गोलंदाज मोहम्मद सिराजला वर्णद्वेषी शेरेबाजीचा सामना करावा लागला. मैदानावर घडलेल्या या प्रकाराबाबत भारतीय क्रिकेट संघाने पंचांकडे औपचारिक तक्रार नोंदवली आहे. सिडनीच्या मैदानावर मद्याच्या अमलाखाली असलेल्या काही समर्थकांनी मोहम्मद सिराजवर वर्णद्वेषी शेरेबाजी केली. त्यांची वक्तव्ये खूपच अपमानास्पद होती. हा प्रकार कर्णधार अजिंक्य रहाणेच्या निदर्शनास आल्यानंतर त्याने या बाबत मैदानावरील पंचांकडे धाव घेतली. तिसऱ्या दिवसाच्या अखेरच्या सत्रात हा प्रकार घडला. जेव्हा सिराज सीमा रेषेवर फाइन लेगला क्षेत्ररक्षण करत होता. इंडिया टुडेने हे वृत्त दिले आहे.
बरोबर १३ वर्षांपूर्वी याच सिडनीमध्ये भारत-ऑस्ट्रेलिया कसोटी मालिकेत वर्णद्वेषी शेरेबाजीवरुन एक मोठा वाद झाला होता. अँड्रयू सायमंडसने हरभजन सिंगवर वर्णद्वेषी शेरेबाजीचा आरोप केला होता. हरभजनने वर्णद्वेषी शेरेबाजी करताना मला माकड म्हटले असा आरोप सायमंडसने केला होता. या आरोपाचे मैदानावर आणि मैदानाबाहेरही पडसाद उमटले. दोन्ही संघांमधील मैत्रीपूर्ण वातावरण बिघडले होते. दोन्ही देशाची क्रिकेट मंडळ, खेळाडू, माजी खेळाडू, मीडिया आणि दोन्ही देशाची सरकारं या वादामध्ये सहभागी झाली होती.
तिसऱ्या दिवसाखेर ऑस्ट्रेलिया वरचढ
सिडनी कसोटीत ऑस्ट्रेलियाच्या पहिल्या डावात ३३८ धावा झाल्या होत्या. त्यानंतर फलंदाजीसाठी उतरलेल्या भारतीय संघाने पहिल्या डावात सर्वबाद २४४ धावा केल्या. त्यामुळे ऑस्ट्रेलियाला ९४ धावांची आघाडी मिळाली. तिसऱ्या दिवसाखेर ऑस्ट्रेलियाने २ बाद १०३ धावा केल्या आहेत. त्यामुळे आता त्यांची आघाडी १९७ धावांपर्यंत वाढली आहे. दरम्यान भारताचे रविंद्र जडेजा आणि रिषभ पंत हे दोन खेळाडू दुखापतग्रस्त झाले असून त्यांना स्कॅनसाठी हॉस्पिटलमध्ये घेऊन जाण्यात आले होते.
