मुंबई (वृत्तसंस्था) राज्यात सत्तासंघर्ष टोकाला पोहोचला असताना शिवसेना नेते संजय राऊत यांना ईडीनं समन्स बजावलं आहे. यावर माझी मान कापली तरी मी गुवाहाटीचा मार्ग स्विकारणार नाही. या.. मला अटक करा !, असं म्हटलं आहे. संजय राऊत यांनी आपल्या ट्विटर अकाऊंटवरून याबाबत ट्विट केलं आहे.
संजय राऊत यांनी ट्विटमध्ये म्हटलं आहे की, मला आताचा समजले ED ने मला समन्स पाठवले आहे. छान, महाराष्ट्रात मोठ्या घडामोडी सुरू आहेत. आम्ही सगळे बाळासाहेबांचे शिवसैनिक मोठ्या लढाईत उतरलो आहोत. मला रोखण्यासाठी..हे कारस्थान सुरू आहे. माझी मान कापली तरी मी गुवाहाटीचा मार्ग स्वीकारणार नाही.या..मला अटक करा ! जय महाराष्ट्र !. दरम्यान, गोरेगावमधील पत्राचाळ घोटाळा जवळपास १०३४ कोटींचा आहे. याच घोटाळ्याची चौकशी ईडीकडून सुरू आहे. या अंतर्गत प्रवीण राऊत यांची ७२ कोटींची मालमत्ता याआधी जप्त करण्यात आलेली आहे. त्यानंतर संजय राऊत यांच्या पत्नीशी निगडीत जागांवर ईडीकडून कारवाई करण्यात आली होती.
एकीकडे शिंदे गटाने बंड केल्याने शिवसेना अडचणीत सापडली आहे. तर दुसरीकडे शिवसेनेच्या बड्या नेत्यांना ईडीकडून समन्स बजावण्यात येत आहे. विशेष बाब म्हणजे राज्याचे परिवहनमंत्री व शिवसेनेचे नेते अनिल परब यांची सुद्धा सध्या ईडीकडून चौकशी केली जात आहे. त्यातच आता खासदार संजय राऊत यांना ईडीने समन्स बजावलं असल्याने काय ती नोटीस काय ते टायमिंग अशीच चर्चा महाराष्ट्रात रंगली आहे.