मुंबई (वृत्तसंस्था) क्रुझ ड्रग्ज प्रकरणी आर्यन खानच्या जामिनावर सुनावणीसाठी मुंबई उच्च न्यायालयानं पुन्हा एकदा पुढची तारीख दिलीय. त्यामुळे आर्यन खानसह इतर आरोपींना आजची रात्रही तुरुंगातच काढावी लागेल. उद्या गुरुवारी दुपारी २.३० वाजल्यानंतर या प्रकरणात सुनावणी सुरू होईल, असं सांगण्यात आलं आहे.
ड्रग्ज प्रकरणात अटक करण्यात आलेला आर्यन खान याला आज जामीन मिळेल अशी अपेक्षा व्यक्त केली जात होती. मात्र आज मुंबई हायकोर्टात झालेल्या सुनावणीत त्याला दिलासा देण्यात आलेला नाही. आजही त्याच्या जामीनावर कोर्टाकडून निर्णय घेण्यात आलेला नाही. त्यामुळे आर्यन खान याला आणखी एक दिवस तुरुंगात राहावं लागणार आहे. दुसरीकडे कोर्टात मुनमुन धमेचा याच्या वकिलांनी आपला पक्ष कोर्टासमोर मांडला. मुनमुनने ड्रग्सचं सेवन केलं नव्हतं. तिच्याजवळ काही सापडलेलंही नाही. त्याशिवाय मुनमुनचा आर्यन आणि अरबाजशी काहीही संबंध नसल्याचं वकिलाने सांगितलं.
या सुनावणीत अरबाज मर्चंटसाठी युक्तीवाद करताना ज्येष्ठ वकील अमित देसाई म्हणाले, “काल मी अटकेच्या मुद्द्यावर बोललो आणि अटकेचा मेमो वाचून दाखवला. ३ ऑक्टोबर रोजी या तिन्ही आरोपींना एकसारख्याच गुन्ह्यांसाठी अटक केली. त्यावेळी कलम २७ (अ) आणि २९ लावण्यात आले नव्हते. त्यांना केवळ कलम २० (ब) आणि २७ साठी अटक केली होती. या सर्व गोष्टींचा असा अर्थ निघतो की हे तिघे तेथे केवळ ड्रग्ज सेवन करण्यासाठी आले होते. अटकेच्या मेमोत देखील तसंच म्हटलंय.”
“जामीन मिळणं हा कायदा आणि नियम आहे, तर तुरूंग हा अपवाद आहे. मात्र, सध्या अटक करणे नियम आणि जामीन अपवाद झालाय. या प्रकरणात कोणतंही षडयंत्र नव्हतं. ही केवळ व्यक्तीगत कृती असताना अटकेची काय गरज होती? दुपारी २ वाजता त्यांना अटक करण्यात आली आणि रात्री ७ वाजता त्यांना न्यायालयासमोर हजर करण्यात आलं. कोठडी मागताना देखील तेव्हा षडयंत्र असल्याचा काहीही उल्लेख नव्हता. नंतर हे ८ लोकांचं षडयंत्र असल्याचा दावा करण्यात आला आणि आता २० लोकांचं षडयंत्र असल्याचा दावा केला जातोय,” असंही अमित देसाई यांनी सांगितलं.
“न्यायालयाने एनसीबीच्या मागणीनुसार आरोपींना ७ ऑक्टोबरपर्यंत कोठडी दिली. मात्र, आजपर्यंत षडयंत्र केल्याप्रकरणी एकालाही अटक करण्यात आलेली नाही. षडयंत्र हा एक स्वतंत्र गुन्हा आहे. पंचनाम्यात देखील हे प्रकरण केवळ व्यक्तीगत ड्रग्ज सेवनाचं असल्याचं म्हटलं आहे. अटकेच्या मेमोत देखील व्यक्तीगत सेवनाचाच आरोप आहे. “
आज देखील कोर्टात गर्दी
आज पुन्हा कोर्टात वकिलांची गर्दी झालेली पाहायला मिळाली. कोर्टात प्रवेश मिळवण्यासाठी कोर्टाबाहेर पोलिसांसोबत वकिलांची हुज्जत घातलेली देखील पाहायला मिळाली.
