पाचोरा (प्रतिनिधी) पोट खराब जमीन वहितीखाली लावणेकामी १५ हजार रुपयांची लाच मागून दहा हजारांची लाच स्वीकारताना पाचोरा प्रांताधिकारी कार्यालयातील सहाय्यक महसूल अधिकारी गणेश लोखंडे यांना लाचलुचपत प्रतिबंधक विभागाने बुधवारी रंगेहात पकडले. ही कारवाई १० सप्टेंबर रोजी दुपारी सुमारे ४.१५ वाजता करण्यात आली.
एसीबीच्या पथकाने रंगेहात पकडलेल्या सहाय्यक महसूल अधिकारी गणेश बाबुराव लोखंडे (वय ३७), असे लाच स्वीकारलेल्या व्यक्तीचे नाव आहे. लोखंडे हे पाचोरा येथील उपविभागीय अधिकारी कार्यालयात सहाय्यक महसूल अधिकारी पदावर कार्यरत आहेत. तक्रारदाराच्या पत्नीच्या नावे कोकडी (ता. पाचोरा) शिवारात पोट खराब क्षेत्र असून, ते त्यांनी मेहनत वहितीखाली आणले आहे. तसेच त्या क्षेत्रावर ते सध्या पीक लागवड करत आहे. परंतु, सदरचे क्षेत्र हे गाव नमुना नंबर ७/१२ मध्ये पोट खराब म्हणून दाखल असल्याने त्यांना नैसर्गिक आपत्तीची नुकसान भरपाई आणि शेती विषयक कर्ज मिळत नाही. म्हणून सदरचे पोट खराब क्षेत्र गाव नमुना नंबर ७/१२ वर वहितीखाली लावणेकामी तक्रारदार यांनी पत्नीचे नाव लावण्यासाठी पाचोरा उपविभागीय कार्यालयात अर्ज केला होता. अर्जात नमुद केलेले काम करून देण्यासाठी सदर कार्यालयातील सहाय्यक महसूल अधिकारी गणेश लोखंडे यांची भेट तक्रारदाराने घेतली.
आधी पाच हजार तर, पंचासमोर घेतली १० हजारांची लाच
काम करून देण्याच्या मोबदल्यात १५ हजार रूपये लाचेची मागणी संशयित महसूल अधिकारी लोखंडे यांनी केली. तक्रारदाराने लोखंडे यांना पाच हजार रुपये रोख देऊन उर्वरित १० हजार रुपये दि. १० सप्टेंबर रोजी देण्याचे सांगितले होते. त्यामुळे उर्वरीत पैसे दिल्यावर तुमचे काम करुन देईल, असे लोखंडे यांनी सांगितले होते. यामुळे तक्रारदाराने जळगाव येथील लाचलुचपत प्रतिबंधक विभागाकडे तक्रार दिली असता सदर तक्रारीची पडताळणी करून सापडा रचला होता. यावेळी गणेश लोखंडे यांनी तक्रारदार यांच्याकडून १० हजार रुपयांची लाच स्वीकारताच लाच लुचपत वलूचपत प्रतिबंधक विभागाच्या पथकाने लोखंडे यांना रंगेहात पकडले. दरम्यान, गणेश लोखंडे यांनी तक्रारदार यांच्याशी चर्चा करून यापुर्वी ५ हजारांची लाच घेतल्याचे देखील कबुल केले आहे.
यांच्या पथकाने केली कारवाई
सदरची कारवाई जळगाव येथील लाचलुचपत प्रतिबंधक विभागाचे पोलीस उपअधीक्षक योगेश ठाकूर यांच्या मार्गदर्शनाखाली सापळा व तपास अधिकारी हेमंत नागरे, पोलीस शिपाई भूषण पाटील. राकेश दुसाने, अमोल सुर्यवंशी भारत तांगडे यांनी यशस्वी केली.
