गुवाहाटी (वृत्तसंस्था) तत्कालीन पंतप्रधान इंदिरा गांधी (Indira Gandhi) यांच्या विरोधात निदर्शनं करत असताना त्यांना बेदम मारहाण करण्यात आल्याचा एक किस्सा गृहमंत्री अमित शहा यांनी आपल्या भाषणात सांगितला. ते गुवाहाटी इथं पक्षाच्या नवीन कार्यालयाचं उद्घाटन केल्यानंतर बोलत होते.
भाजपचे राष्ट्रीय अध्यक्ष जेपी नड्डा यांनी नुकतंच बेलटोला, गुवाहाटी इथं पक्षाच्या नवीन कार्यालयाचं उद्घाटन केलं. यादरम्यान अमित शहांनी जनतेलाही संबोधित केलं. गृहमंत्री अमित शहांनी भाषणात सुरुवातीच्या काळातील एक किस्साही सांगितला. तत्कालीन पंतप्रधान इंदिरा गांधी यांच्या विरोधात निदर्शनं करत असताना त्यांना बेदम मारहाण करण्यात आल्याचं त्यांनी यावेळी सांगितलं. आसामचे माजी मुख्यमंत्री आणि काँग्रेसचे माजी नेते हितेश्वर सैकिया यांच्या कार्यकाळात ABVP कार्यकर्त्यांना झालेल्या मारहाणीचा किस्सा अमित शहांनी सभेत सांगितला. अमित शहा म्हणाले, मी एकदा अभाविपच्या कार्यक्रमात इथं आलो होतो. त्यावेळी आम्हाला हितेश्वर सैकियानं खूप मारहाण केली होती. आम्ही त्यावेळी घोषणा देत आसामचे रस्ते सुनसान आहेत, इंदिरा गांधी खुनी आहेत, असं म्हटलं होतं. याच आसाममध्ये सलग दोन वेळा भाजपचं सरकार स्थापन होईल, असं आम्हाला कधीच वाटलं नव्हतं असं देखील त्यांनी सांगितलं.
