अमळनेर (प्रतिनिधी) तालुक्यातील नगाव येथील लसीकरण केंद्रावर ग्रामपंचायतीचे नियोजन नसल्याने गर्दी होऊन महिलांना धक्का बुक्की झाली. यावेळी एका संतापलेल्या महिलेने एका पुरुषाला चांगलेच ठोकून काढले.
अनेक जणांच्या पहिल्या डोसला ८४ दिवस झाल्यानंतर दुसऱ्या डोस साठी गर्दी वाढू लागली आहे. खंड पाडून लस मिळत असल्याने लस आल्याची माहिती मिळताच गर्दी होत असते. तालुक्यातील नगाव येथे ऑफलाईन पद्धतीने लस देण्यात येणार होती. त्यामुळे महिला आणि पुरुषांनी एकत्र गर्दी केली. लसीकरण कक्षात सुमारे १०० जण घुसल्याने महिलांना धक्के लागल्याने महिला संतापल्या आणि यावेळी एक महिलेने एका पुरुषाला ठोकून काढले. हा गोंधळ झाल्यानंतर अर्धा ते पाऊण तास लसीकरण बंद करण्यात आले होते. त्यांनतर डॉ. संजय पाटील यांना बोलावण्यात आले. त्यांनी ग्रामस्थांची समजूत घातली. शिस्तीचे आवाहन केल्यानंतर ग्रामस्थ शांत झाले.
