जळगाव (प्रतिनिधी) मध्यरात्रीच्या सुमारास दुकानाचे शटरचे कुलूप तोडू चोरीचा प्रयत्न केला. ही घटना शुक्रवारी सकाळच्या सुमारास नवीन बी. जे. मार्केट परिसरात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला असून याप्रकरणी एका संशयिताला ताब्यात घेतले आहे.
शहरातील अयोध्या नगरात राहणारे चैतन्य सुनील कोल्हे (वय ३५) यांचे नवीन बी. जे. मार्केट परिसरात गायत्री कॉस्मेटीकचे दुकान आहे. दि. १२ रोजी रात्रीच्या सुमाास ते दुकान बंद करुन घरी गेले. त्यानंतर दुसऱ्या दिवशी सकाळी त्यांचे भाऊ मंदार कोल्हे यांनी त्यांना फोन करुन आपल्या दुकानाच्या शटरचे कुलूप कोणतरी तोडण्याचा प्रयत्न केला असे सांगितले. त्यानुसार कोल्हे तात्काळ दुकानावर आले. त्यांनी पाहणी केली असता, त्यांना शटरचे कुलूप आणि कडीकोयंडा तुटलेला दिसून आला. त्यांनी दुकानात पाहणी केली केल्यानंतर दुकानातील साहित्य जागेवर होते. दरम्यान, कोल्हे यांनी जिल्हापेठ पोलिसात तक्रार दिली असून त्यानुसार गुन्हा दाखल करण्यात आला आहे. तपास पोहेकॉ मिलींद सोनवणे हे करीत आहे. याप्रकरणी एका संशयिताला पोलिसांनी चौकशीसाठी ताब्यात घेतले असून त्याची कसून चौकशी केली जात आहे.
