पाचोरा (प्रतिनिधी) शहरातील मोढाळे रोड येथील कृषक धान्य व्यापार नावाचे व ऑईल मिल बाजोरीया ऑईल रीफायनरी येथील सुरक्षा रक्षकास चाकूचा धाक दाखवत हातपाय बांधून धाडशी चोरी केल्याची खळबळजनक घटना घडली आहे. तीन चोरट्यांनी चार लाख पाच हजार रोख रकमेसह अन्य वस्तूंची चोरी केली.
आशिष जगदीश बाजोरिया (पाचोरा) यांच्या मालकीची मोंढाळा रोडवरील औद्योगिक वसाहतीमध्ये बाजोरिया ऑइल मिल कंपनी असून तेथे कृषक माल खरेदीचा व्यापार केला जातो. दि. २२ रोजी व्यापारी आशिष बाजोरिया हे संध्याकाळी काम आटोपून रुपये ४ लाख ५ हजार रूपये तिजोरीत ठेवून घरी आले. त्यानंतर मध्यरात्री कंपनीच्या गेटवर तोंडाला रुमाल बांधलेले, हातमोजे व हातात धारदार शस्त्र असलेले तीन अनोळखी व्यक्ती आले. त्यांनी सुरक्षा रक्षक मधुकर पाटील यांचे हातपाय बांधून, चाकूचा व धारदार शस्त्राचा धाक दाखवून कंपनीच्या ऑफिसचे कुलूप तोडले. ऑफिसमध्ये प्रवेश करून तिजोरीतील ४ लाख १८ हजाराचा ऐवज अज्ञात तीन इसमानी चोरून नेला.
या बाबत आशिष जगदिश बाजोरिया यांनी पाचोरा पोलिसात फिवांद दिली असून अज्ञात चोरट्या विरुद्ध भा. द. वी. कलम ३९४ ४५८, ३४ प्रमाणे गुन्हा दाखल करण्यात आला आहे. पुढील तपास पोलीस निरीक्षक राहुल खताळ यांच्या मार्गदर्शनात पोलिस उपनिरीक्षक योगेश गणने करीत आहे.
