अहमदनगर (वृत्तसंस्था) बीड जिल्ह्यातील केतुरा गावातील विवेक रहाडे (वय १८) याने घरात गळफास घेऊन आत्महत्या केली होती. तेथे आढळून आलेल्या चिठ्ठीत मराठा आरक्षणाला स्थगिती मिळाल्याने आत्महत्या करीत असल्याचा मजकूर असलेली सुसाईड नोट मिळून आली होती. परंतू पोलीस तपासात आता ती सुसाईड नोट बनावट असल्याची धक्कादायक माहिती समोर आली असून बीड पोलिसांनी सामाजिक शांततेचा भंग केल्याचा गुन्हा अज्ञातांविरुद्ध गुन्हा दाखल केला आहे.
मराठा आरक्षणाला स्थगिती मिळाल्याने बीड जिल्ह्यातील तरुणाने आत्महत्या केल्याचे सांगितल्यानंतर राज्यभर मराठा समाजात संतापाची लाट उसळली होती. परंतू त्या सुसाईड नोट मधील अक्षर आत्महत्या केलेल्या युवकाचे नसून ती नोट बनावट असल्याचे पोलिसांना तपासात आढळून आले आहे. आता बनावट सुसाईड नोट लिहून सामाजिक शांततेचा भंग केल्याचा गुन्हा अज्ञातांविरुद्ध बीड ग्रामीण पोलिस ठाण्यात नोंदविण्यात आला आहे. रहाडेच्या शाळा आणि कॉलेजमधील उत्तरपत्रिका ताब्यात घेऊन त्या हस्ताक्षर तज्ज्ञांकडे पाठविण्यात आल्या. त्या आधारे तज्ज्ञांनी हस्ताक्षराची पडताळणी करून पोलिसांना अहवाल दिला आहे. या चिठ्ठीतील अक्षर रहाडे याचे नसल्याचे त्यात म्हटले आहे. दरम्यान, उपमुख्यमंत्री अजित पवार यांचे चिरंजीव पार्थ पवार यांनीही या विषयावर ट्वीट केले होते. यावर चिंता व्यक्त करताना त्यांनी मराठा नेत्यांवर निशाणा साधत सुप्रीम कोर्टात हस्तक्षेप याचिका दाखल करण्याचे संकेतही दिले होते.
