जळगाव (प्रतिनिधी) जिल्ह्यातील पाचोरा तालुक्यातील नगरदेवळा येथील पिता पुत्रावर मधमाशांनी हल्ला (Honey Bee) केल्याची घटना घडली आहे. यात पित्याचा मृत्यू झाला असून मुलगा जखमी झाला आहे. सब्दर सैयद इस्माइल सैय्यद (वय ५८) असे मयताचे नाव असून त्यांचा मुलगा आबिद सब्दर सैय्यद हा जखमी असून त्याच्यावर उपचार सुरू आहेत.
सैय्यद सबदर इस्माईल व त्यांचा मुलगा अबीद सैय्यद इस्माईल हे दोघे कामानिमित्त बाहेर गेले होते. सायंकाळी चार वाजता घराकडे परतत असताना शिंदोळ गावाजवळ रस्त्यालगत असलेल्या झाडावर बसलेल्या मधमाश्या अचानक उठल्या. आणि चवताळलेल्या माशांनी दोघांवर जोरदार हल्ला चढवला. अचानक झालेल्या या हल्ल्याने दोघेही घाबरुन गेले. यावेळी मधमाश्यांनी तोंडावर, डोक्यात आणि हात पायांवर जोरदार डंख मारले. या हल्ल्यात सैयद सबदर सैयद इस्माईल यांचा जागीच मृत्यू झाला. तर मुलगा गंभीर जखमी झाला. मधमाशांनी संपूर्ण शरीरावर चावा घेतल्याने सफदर यांचा जागीच मृत्यू झाला तर अबिद यास पाचोरा येथे व तेथून जळगाव जिल्हा रूग्णालयात हलविण्यात आले.