जळगाव (प्रतिनिधी) शहरातील जागृती हाऊसिंग सोसायटीमध्ये अज्ञात चोरट्यांनी भरदुपारी धाडसी घरफोडी करून सोने-चांदीचे दागिन्यांसह रोकड लंपास केली आहे.
या संदर्भात अधिक असे की, हरिसिंग नयनसिंग पाटील (वय ४७, रा.जागृती हाऊसिंग सोसायटी) हे आपल्या परिवारासह वास्तव्यास आहेत. दि. २९ जुलै रोजी दुपारी ३ ते ५ वाजेच्या दरम्यान, बाहेर गेलेले होते. अज्ञात चोरट्यांनी नेमकी हीच वेळ साधत कुलूप तोडून घरात हात साफ केला. चोरट्यांनी १५ हजार किंमतीचे २ ग्रॅम वजनाचे वाट्या व ३ ग्रॅम वजनाचे मणी असलेले सोन्याचे मंगळसुत्र, ५ भार वजनाचे चांदीचे पायीतील साखळ्या, ४० हजार रुपये असा एकूण ५७ हजाराचा ऐवज चोरून नेला आहे. या प्रकरणी रात्री रामानंद पोलीस स्थानकात गुन्हा दाखल करण्यात आला असून पुढील तपास पो.ना. प्रवीण जगदाळे हे करीत आहेत. दरम्यान, हरिसिंग पाटील हे पत्रकार छगनसिंग पाटील यांचे मोठे बंधू आहेत.
