जळगाव (प्रतिनिधी) भाईचंद हिराचंद रायसोनी (बीएचआर) मधील घोटाळ्यात डोकं चक्रावून टाकणारी माहिती समोर आली आहे. ‘बीएचआर’ची अधिकृत वेबसाईट असतांना बनावट सॉफ्टवेअर तसेच वेबसाईट तयार करून पतसंस्थेच्या मालमत्ता गुप्त कटातील साथीदार सुनील झंवर व त्याच्या फर्मच्या नावे बेकायदेशीररित्या वर्ग करून पूर्ण मोबदला न देता ठेवीदारांच्या पावत्या ३० टक्‍क्‍याने विकत घेऊन त्यांच्या ७० टक्के रकमेचा व संस्थेच्या मालमत्तेचा अपहार करत असल्याची धक्कादायक माहिती पोलीस तपासात समोर आली आहे.
भाईचंद हिराचंद रायसोनी मल्टीस्टेट सहकारी पतसंस्था शाखा घोले रोड पुणेचे अवसायक जितेंद्र खंडारे, प्रकाश वाणी, कुणाल शहा, सुनील झंवर, महाविर जैन, सुजित वाणी, धरम साखला, योगेश साखला, विवेक ठाकरे, माहेश्वरी व इतरांनी एकमेकांच्या संगनमताने सदर पतसंस्थेच्या मालमत्ता बनावट वेबसाइट तयार करून गुप्त कटातील साथीदार सुनील झंवर व त्याच्या फर्मच्या नावे बेकायदेशीररित्या वर्ग करून पूर्ण मोबदला न देता ठेवीदारांच्या पावत्या ३० टक्‍क्‍याने विकत घेऊन त्यांच्या ७० टक्के रकमेचा व संस्थेच्या मालमत्तेचा अपहार केला. संस्थेच्या मालमत्ता अत्यंत अल्पदरात बेकायदेशीर वर्ग केल्याचे दाखवले व ठेवीदारांना पूर्ण रक्कम दिल्याच्या खोट्या नोंदी संस्थेच्या रेकॉर्डला संगनमताने अजित वाणी इतर आरोपींच्या सांगण्यावरून केल्यात. तर कंडारे याने समप्रमाणात गुंतवणूकीची रक्कम अदा करणे बंधनकारक असताना दिली नाही. तर कुणाल शहा नावाच्या व्यक्तीकडून नवीन सॉफ्टवेअर तयार करून त्यात पाहिजे त्यावेळी मागील तारखेचे अथवा हवा तसा बदल करून या आरोपींनी गैरव्यवहार केला. महावीर जैन मार्फत हे आरोपी फोन करून आर्थिक देवाणघेवाण करून सदरची कर्ज प्रकरणे बेकायदेशिररित्या अॅडजेस्ट करायची, असेही पोलीस तपासात समोर आले आहे.
योजनाबध्द रितीने व सुनियोजित पध्दतीची संघटीत गुन्हेगारी
पोलीस तपासात असे निष्पन्न झाले की, बीएचआर संस्थेच्या मालमत्ता विक्रीसाठी २ अधिकृत वेबसाईट अस्तीत्वात असताना आरोपींतांनी बनावट खाजगी वेबसाईट कुणालाही कळू नये म्हणून अहमदाबादच्या कुणाल शहा या व्यक्तीकडून संगणमताने तयार केली. या बनावट वेबसाईटव्दारे सदर संस्थेच्या मालमत्ता विक्री केल्याचा खोटा देखावा निर्माण करून संस्थेच्या करोडो रूपयांच्या मालमत्तेचा विक्रीच्या नावाखाली अपहार केला. या आरोपींची गुन्हा करण्याची विशिष्ट शैली असल्याचे व या आरोपींनी योजनाबध्द रितीने व सुनियोजित पध्दतीने संघटीत गुन्हेगारी करून गंभीर गुन्हे सदर संस्थेत केल्याचे निष्पन्न झाले असल्याचेही पोलीस तपासात समोर आले आहे.
सोसायटीची पार्श्वभूमी
भाईचंद हिराचंद रायसोनी मल्टीस्टेट को ऑपरेटीव्ह सोसायटी, व तिचे संचालक यांनी अशाच प्रकारे यापुर्वी हजारो गुंतवणुकदारांच्या ठेवी घेवून त्याचा अपहार केल्यामुळे नमूद सोसायटी व तिचे संचालक यांच्या विरूध्द यापुर्वी सुमारे ८१ गुन्हे दाखल आहेत. तर सुमारे ११०० ते १२०० कोटी एवढया रकमेचा अपहार केला असल्याचे नमूद आहे. संस्थेच्या सर्व संचालक यांना अटक केली असून ते सध्या जेलमध्ये आहेत. सोसायटीचे संचालकांनी केलेल्या अपहारामुळे सदर सोसायटीवर लिक्वीडेटर नेमला गेला होता. नमूद लिक्वीडेटर याने इतर आरोपींसोबत संगणमताने कट करून ठेवीदारांना न्याय मिळवून न देता सोसायटीच्या स्थावर व जंगम मालमत्ते वेगवेगळ्या प्रकारे खोटे व बनावट दस्त करून त्याचे फायदयासाठी अपहार केला आहे.
