जळगाव (प्रतिनिधी) बीएचआर घोटाळ्यातील संशयित आरोपी सीए महावीर जैन यांच्या जामीन अर्जावर आज सलग दुसऱ्या दिवशी सुनावणी झाली. जैन यांच्या कार्यालातून जळगाव एमआयडीसीच्या काही फाईल्स् मिळाल्या आहेत. तसेच तत्कालीन ईओडब्ल्यूचे अधिकारी पो.नि.सुनील कुऱ्हाडे यांनी ज्याच्या विरुद्ध तक्रार आहे, त्याच अवसायक कंडारेला फॉरेंसिक ऑडिटची साडेसहा लाख रुपये फी सीए महावीर जैनला का द्यायला लावली?, यासह अनेक गंभीर मुद्यांची चौकशी सुरु असल्याचे सांगत सरकारी पक्षाच्यावतीने विशेष सरकारी वकील अॅड.प्रवीण चव्हाण यांनी सीए जैन यांच्या जामीन अर्जावर जोरदार आक्षेप घेत न्यायालयसमोर प्रभावी मुद्दे मांडले.
अॅड.प्रवीण चव्हाण यांनी सीए जैन यांच्या जामीन अर्जावर जोरदार आक्षेप घेत न्यायालयाच्या निदर्शनास आणून दिले की, सीए जैन यांचा बीएचआर घोटाळ्यात कशा पद्धतीने महत्वाचा सहभाग होता. सीए जैन यांनी समान न्याय तत्वाचा वापर न करता वेळोवेळी अवसायक कंडारेला मदत केली आहे. त्याला वाचविण्याचा प्रयत्न केला. सीए जैन यांनी आपल्या अधिकारांचा गैरवापर केला. तसेच यांच्या कार्यालातून जळगाव एमआयडीसीच्या काही फाईल्स् मिळाल्या आहेत. त्या नेमक्या कशाशी संबंधित आहेत?. तसेच तत्कालीन इओडब्ल्यूचे अधिकारी सुनील कुऱ्हाडे यांनी ज्या कंडारे विरुद्ध तक्रार होती, त्याच अवसायक कंडारेला फॉरेंसिक ऑडिटची साडेसहा लाख रुपये फी सीए महावीर जैनला का द्यायला लावली?, असा प्रश्न अॅड. चव्हाण यांनी उपस्थित केल्यानंतर एकच चर्चा सुरु झाली. अगदी कंडारेची नियुक्ती बीएचआरमध्ये कशी झाली? ही बाब देखील अॅड. चव्हाण यांनी न्यायालयाच्या निदर्शनास आणून दिली. तर दुसरीकडे उद्या (बुधवारी) बचाव पक्ष आपले म्हणणे सादर करण्याची शक्यता आहे. त्यानंतर न्यायालय आपला निर्णय देईल. दरम्यान, सुजित बाविस्कर (वाणी) च्या जामीन अर्जावर कदाचित उद्या निकाल येण्याची शक्यता आहे.
