जळगाव (प्रतिनिधी) भाईचंद हिराचंद रायसोनी मल्टिस्टेट पतसंस्थेच्या दोन हजार कर्मचाऱ्यांचे पीएफचे पैसे संचालकांनी वेळोवेळी जमा केले नाहीत. तसेच कर्मचाऱ्यांना पीएफचे ६ कोटी ५० लाख रुपये न दिल्याने नाशिकच्या भविष्यनिर्वाह निधी आयुक्तांनी जप्तीचे आदेश दिले आहेत. त्यानुसार संस्थेचे चार बँक खाते सील करण्यात आले आहेत.
बीएचआरचे चार बँक खाते सील
बीएचआर पतसंस्थेत कार्यरत असलेल्या दोन हजार कर्मचाऱ्यांच्या भविष्यनिर्वाह निधीच्या १३ कोटी रुपयांची रिकव्हरी पीएफ कमिशनर यांनी काढलेली आहे. ही संस्था अवसायनात जाण्यापूर्वी संचालक मंडळ कार्यरत होते. तेव्हापासून बीएचआरच्या दोन हजार कर्मचाऱ्यांचे पीएफचे पैसे संचालकांनी वेळोवेळी जमा केले नव्हते. संचालक मंडळ कार्यरत असताना कर्मचाऱ्यांच्या पीएफचे ६ कोटी ५० लाख रुपये पीएफ कमिशनर यांनी बीएचआरकडून जप्त केले होते. सद्य:स्थितीत ही पतसंस्था अवसायनात आहे. कर्मचाऱ्यांच्या भविष्यनिर्वाह निधीच्या उर्वरित ६ कोटी ५० लाख रुपयांच्या रिकव्हरीसाठी पीएफ कमिशनर नाशिक यांनी जप्ती आदेश दिलेले आहेत. या रकमेच्या वसुलीसाठी बीएचआरचे चार बँक खाते त्यांनी सील केले आहेत.
तर ठेवीदारांना ठेवी परत मिळण्यास विलंब लागणार
दरम्यान, अवसायकांकडून बीएचआरची कर्जवसुली करून ठेवीदारांना परत करण्याची कार्यवाही सुरू असून वसूल झालेली रक्कम जप्त झाल्यास ठेवीदारांना त्यांच्या ठेवी परत मिळण्यास विलंब लागणार आहे. कर्मचाऱ्यांच्या भविष्यनिर्वाह निधीचे पैसे बीएचआर या पतसंस्थेने वेळोवेळी भरले नाहीत. त्यामुळे या पतसंस्थेच्या जप्तीचे आदेश निघाले आहेत. या संदर्भात उच्च न्यायालयाच्या औरंगाबाद खंडपीठात बीएचआरतर्फे रिट पिटिशन दाखल करण्यात आलेली आहे. त्यावर गुरुवारी सुनावणी होणार असल्याचे अवसायक चैतन्यकुमार नासरे यांनी सांगितले.
