भुसावळ (प्रतिनिधी) जुन्या वादातून मोटारसायकल जबरदस्तीने जोराने ढकलून देत डोक्यास गंभीर दुखापत करून एका २३ वर्षीय तरुणाचा खून केल्याची खळबळजनक घटना घडली आहे. ही घटना दि. १७ रोजी फेकरी उड्डाण पुला जवळ साक्री सर्विस रोडवर सकाळी उघडकीस आली.
याबाबत आकाश शांताराम शेळके (वय २५, रा. फेकरी, वाल्मिक नगर) यांनी फिर्याद दिली आहे. त्यानुसार त्यांचा लहान भाऊ मंगल शांताराम शेळके (वय २३) याच्यासोबत पुर्वी झालेल्या वाद उकरुन काढून राहुल तुकाराम पाडळे (वय २८, रा. मु.पोस्ट. फेकरी ता. भुसावळ) याने दि. १६ चे रात्री १२ ते दि. १७ रोजी सकाळी ८ वाजेच्या दरम्यान, मंगलची कॉलर पकडून त्याला शिवीगाळ केली.
तसेच त्याच्याशी झटापट करुन त्याला सिडी डिलक्स मोटारसायकल (क्रमांक एम.एच.19 ई.बी.2024) वर जबरदस्तीने बसवत जोराने ढकलून दिल्याने तो फेकरी उड्डाणपुलाखाली पडला. यामुळे त्यास जबर दुखापत होवून मेंदूला मार लागल्याने त्याचा जागीच मृत्यू झाला. या प्रकरणी पोलिसांनी खुनाचा गुन्हा दाखल करत संशयित आरोपी राहुल पाडळे याला अटक केली असून पुढील तपास परी. उप विभागीय पोलीस अधिकारी सतिश कुलकर्णी हे करत आहेत.
