मुंबई (वृत्तसंस्था) दापोली रिसॉर्ट प्रकरणी अंमलबजाणी संचालनालय अर्थात ईडीने ठाकरे गटाचे नेते अनिल परब यांचे निकटवर्तीय सदानंद कदम यांना अटक केली आहे. चार तासांच्या चौकशीनंतर कदम यांना अटक करण्यात आली आहे. विशेष म्हणजे, पाच दिवसांपूर्वीच उद्धव ठाकरे यांची खेडमध्ये झालेल्या सभेसाठी सदानंद कदम यांनी मोठी ताकद लावली होती. यावेळी दोघांची भेट देखील झाली होती.
सदानंद कदम हे शिंदे गटाचे नेते रामदास कदम यांचे भाऊ आहेत. दापोली साई रिसॉर्ट प्रकरणात ईडी सदानंद कदम यांची चौकशी करण्यात आली. दापोलीतल्या कुठेशी गावात ईडीचे पथक आज सर्च ऑपरेशन साठी गेलं होत. त्यानंतरब कदम यांना चौकशीसाठी मुंबईच्या ईडी कार्यालयात बोलावण्यात आले होते. चार तासांच्या चौकशीनंतर सदानंद कदम यांना अटक करण्यात आली आहे.
सदानंद कदम यांनी आपली तब्येत बरी नसल्याने तसेच डॉक्टरांनी 24 मार्चपर्यंत आराम करण्याचा सल्ला दिला असल्याने आपली 23 मार्चनंतर चौकशी करण्यात यावी, अशी विनंती त्यांनी केली होती. पण ईडी अधिकाऱ्यांनी त्यांची विनंती ऐकली नाही. तुम्ही आजच चौकशीला या असा आग्रह ईडी अधिकाऱ्यांनी धरला. त्यामुळे सदानंद कदम यांना ईडी कार्यालयात यावं लागलं.
उद्धव ठाकरे ५ मार्च रोजी कोकणातील खेड शहरात गोळीबार मैदानात भव्य सभा झाली. या सभेसाठी उद्योजक सदानंद कदम यांनी पुढाकार घेऊन ताकद लावली. यावेळी सदानंद कदम यांनी उद्धव ठाकरे यांनी भेटही घेतली. या सगळ्या घडामोडीनंतर सदानंद कदम यांच्यावरती झालेली कारवाई चर्चेचा विषय ठरली आहे.
रत्नागिरी जिल्ह्यातील दापोली जिल्ह्यातील साई रिसॉर्टच्या बेकायदा बांधकामाचं व संशयास्पद खरेदी-विक्रीचं प्रकरण राज्यातील राजकीय वर्तुळात गेल्या अनेक दिवसांपासून गाजत आहे. या प्रकरणात याआधी ठाकरे गटाचे विद्यमान आमदार व माजी मंत्री अनिल परब यांचंही नाव आलं होतं. किरीट सोमय्या यांनी हे प्रकरण उचलून धरत अनेक ठिकाणी तक्रारी केल्या होत्या. यात अनिल परब यांची चौकशीही करण्यात आली होती. दापोली साई रिसॉर्ट प्रकरणी पर्यावरण नियमांचं उल्लंघन आणि अवैध बांधकाम आणि इतर अनियमितततेच ठपका ठेवण्यात आला आहे. या प्रकरणी मनी लाँड्रिंग झाल्याचा आरोप करत ED ने गुन्हा दाखल केला होता.
