पनवेल (वृत्तसंस्था) यशवंतराव चव्हाण पुणे-मुंबई द्रुतगती महामार्गावर चार वाहनांचा विचित्र अपघात झाल्याची घटना घडली. सोमवारी मध्यरात्री झालेल्या अपघातामध्ये दोघांचा मृत्यू झाला, तर तीनजण रुग्णालयात अत्यवस्थ आहेत. स्विफ्ट कारला कंटनेरची, तर मर्सिडिजला आयशरने धडक दिली. मर्सिडिजमधून भाजपाचे नगरसेवक प्रवास करत होते. ते थोडक्यात बचावले. मात्र, त्यांच्यासोबत असलेल्या दोघांचा अपघातात मृत्यू झाला आहे.
अपघातग्रस्त कारला मदत करण्यासाठी पुणे-मुंबई एक्सप्रेस वेवर थांबलेल्या पनवेल नगरसेवकाच्या मर्सिडीज कारला आयशरने मागून धडक दिली. या अपघातात दोघांचा मृत्यू झाला, तर नगरसेवक शरद कांडपिले सुखरुप आहेत. इतरांच्या मदतीसाठी धावून जाणाऱ्या देवदूतांवरच नियतीने घाला घातल्याने सर्वत्र हळहळ व्यक्त केली जात आहे. पुणे-मुंबई एक्स्प्रेस वेवर पनवेलजवळ सोमवारी रात्री अनेक गाड्यांचा भीषण अपघात झाला. आधी स्विफ्ट कारला कंटेनर ट्रेलरने धडक दिली. पनवेल तालुका पोलीस स्टेशनच्या हद्दीत मुंबईकडे जाणाऱ्या लेनवर हा अपघात झाला. सोमवारी मध्यरात्रीच्या सुमारास ही घटना घडली होती.
अपघातग्रस्त स्विफ्ट कारमधील प्रवाशांना मदत करण्यासाठी पनवेलचे नगरसेवक शरद कांडपिले थांबले होते. मात्र त्यांच्याही मर्सिडीज कारला टेम्पोने धडक दिली. अपघातात पनवेलचे दोघे जण मृत्युमुखी पडले, तर दोघे जण जखमी आहेत. जखमी प्रवाशांना नवी मुंबईतील कामोठे येथील एमजीएम रुग्णालय दाखल करण्यात आले आहे. सुदैवाने नगरसेवक शरद कांडपिले अपघातातून बालंबाल बचावले.
अपघातात पनवेल रुग्णवाहिका असोसिएशनचे २६ वर्षीय अध्यक्ष सुशांत मोहिते आणि २४ वर्षीय प्रथमेश बहिरा यांना प्राण गमवावे लागले. ते दोघेही पनवेलचे रहिवासी होते. तर हर्षद खुदकर हे जखमी झाले आहेत. नगरसेवक शरद कांडपिलेही किरकोळ जखमी झाले आहेत. या मल्टी व्हेइकल अपघातातील इतर जखमींना पनवेलच्या अष्टविनायक हॉस्पिटलमध्ये दाखल केले आहे. मदत करणाऱ्या दोघा देवदुतांना अपघातात मृत्यू आल्याने पनवेल परिसरात हळहळ व्यक्त करण्यात येत आहे.
