अमळनेर (प्रतिनिधी) देशामध्ये कोरोनाची दुसरी लाट वेगाने पसरत असल्याने रुग्णांची संख्याही झपाट्याने वाढत आहे. तसेच राज्यात रक्ताचा साठा देखील कमी झाला आहे. त्यामुळे सध्या रक्तदान करण्यासाठी सामाजिक दायित्व म्हणून भारतीय जनता युवा मोर्चा अमळनेर तालुका व शहरतर्फे महाराष्ट्र दिनी १ मे रोजी रक्तदान शिबिराचे आयोजन करण्यात आले आहे.
देशामध्ये कोरोनाच्या वाढत्या रुग्णसंख्येमुळे वैद्यकीय व्यवस्थेवर ताण आला आहे. अनेक ठिकाणी रुग्णांना उपचारांसाठी बेड मिळत नाही, औषधे मिळत नाही इतकेच नाही तर ऑक्सिजनही मिळत नाही. सर्वत्र विदारक अशी स्थिती निर्माण झाली आहे. त्यातच कोरोनाविरुद्ध लढण्यासाठी मोठ्या प्रमाणावर लसीकरणाची मोहिम हाती घेतली आहे. लसीकरणाआधी रक्तदान करण्याचे आवाहन केले जात आहेत. राज्यात रक्ताचा साठा कमी आहे. त्यामुळे रक्तदानाच्या दातृत्वाने गंभीर आजारांसाठी करण्यात येणाऱ्या तातडीच्या शस्त्रक्रिया, अपघातग्रस्त, विविध आजारांचे रुग्ण, थॅलेसिमियाचे रुग्ण आणि हिमोफिलिया या रक्ताच्या आजाराच्या रुग्णांना रक्ताची गरज असते. यापैकी थॅलेसिमिया आणि हिमोफिलियाच्या रुग्णांना नियमितपणे रक्त संक्रमण करून घ्यावं लागतं.
संकलित करण्यात आलेलं रक्त ३५ दिवसांपर्यंत वापरता येऊ शकतं, यामुळेच रक्तपेढ्यांमध्ये सध्या पुरेसा साठा करणं आवश्यक आहे. त्यामुळे सध्या रक्तदान करण्यासाठी सामाजिक दायित्व म्हणून भारतीय जनता युवा मोर्चा अमळनेर तालुका व शहरतर्फे तालुकाध्यक्ष शिवाजी राजपूत, शहराध्यक्ष पंकज भोई, सरचिटणीस राहुल चौधरी, समाधान पाटील, भूषण देवरे, शुभम राजपूत, जगदीश पाटील यांनी रक्तदान करण्याचे कळकळीचे आव्हान रक्तदात्यांना केलेले आहे. दि. १ मे २०२१ रोजी रोटरी हॉल, डी आर कन्या शाळे समोर, सकाळी ९:०० वाजता याठिकाणी आयोजित करण्यात आले आहे.
