जळगाव (प्रतिनिधी) छत्रपती शिवाजी महाराजांबद्दल बेताल वक्तव्य करणाऱ्या राज्यपाल भगतसिंग कोश्यारी यांच्या विरोधात आज शहरातील विविध पुरोगामी संघटनानी महामार्गावर रास्तारोको आंदोलन केले. परंतू तत्पूर्वी मुख्यपदाधिकाऱ्यांना पोलिसांनी ताब्यात घेतल्यामुळे तणाव निर्माण झाला होता.
महाराष्ट्रात छत्रपती शिवाजी महाराजांच्या बद्दल बेताल करणारे राज्यपाल भगतसिंग कोश्यारी यांच्या विरोधात हे आंदोलन करण्यात आले. बांभोरी पुलावर शिवसेनेचे रमेश माणिक पाटील आणि कार्यकर्त्यांनी सकाळी दहा वाजेच्या सुमारास रस्त्यावर येत राज्य सरकारच्या विरोधात घोषणा दिल्या. यामुळे महार्गावरील वाहतूक ठप्प झाली होती. दुसरीकडे लोकसंघर्ष मोर्चाच्या अध्यक्षा प्रतिभा शिंदे, बहुजन जनक्रांती मोर्चाचे मुकूंद सपकाळे यांना रास्ता रोको करण्यापूर्वीच पोलिसांनी त्यांच्या निवासस्थानावरून ताब्यात घेतले. शिंदे हे शिवरामनगरातील निवासस्थानापासून वाहनातून बसून घरून निघत असतानाच त्यांचे वाहन अडविण्यात आले. तासभराने त्यांना रामानंद पोलिस ठाण्यात आणण्यात आले. या ठिकाणी कार्यकर्त्यांची चांगलीच गर्दी जमा झाल्याने दोन्ही नेत्यांना अटक करून कार्यकर्त्यांना पोलिस ठाण्याबाहेर काढण्यात आले. यावेळी प्रतिभा शिरसाट, दिलीप सपकाळे, अमोल कोल्हे, निवेदिता ताढे, मंगला पाटील, सचीन सोमवंशी आदी उपस्थित होते. यामुळे पोलिसांसोबत चांगलाच वाद झाला.
मंत्री चंद्रकांत पाटील हाय हाय, कोश्यारी की हुशारी नही चलेगी, सरकार हमसे डरती है, पुलिस को आगे करती है, या घोषणा यावेळी देण्यात आल्या. देवेंद्र फडणवीस, शिंदे सरकारचाही निषेध करीत आंदोलकांनी जोरदार घोषणाबाजी केली. लोकसंघर्ष मोर्चा, बहुजन जनक्रांती मोर्चा, जिजाऊ ब्रिगेड, मराठा क्रांती मोर्चा, छावा, शिवसेना, राष्ट्रवादी कॉग्रेस, अखिल भारतीय पारधी महासंघ, भारत मुक्ती मोर्चा, रिपब्लीकन पॅथरसह अन्य संघटना सहभागी झाल्या. होत्या
