बोदवड (प्रतिनिधी) बस मधून फुकट प्रवास करता यावा म्हणून एका पठ्ठ्याने अफलातून शक्कल लढवली. परंतु कंडक्टरने भामटेगिरी ओळखताच राडा सुरु झाला. वाद हाणामारीपर्यंत पोहचला. शेवटी बस पोलीस स्थानकाकडे वळविण्यात आली. आपण अडचणीत येऊ हे लक्षात येताच एकाने चालत्या बसमधून उडी मारून पळ काढला.
या संदर्भात अधिक असे की, जामनेर आगाराची बस (एमएच १४ बीआय १६४४) ही दुपारी ३ वाजता जामनेर ते बोदवड प्रवासासाठी निघाली. त्यात बोदवडपासून पाच ते सहा किमी अंतरावर दुपारी चारच्या दरम्यान ही बस येत असताना बसमधील एका प्रवाशाने आधार कार्ड दाखवून वाहकाला आपण ७५ वर्षांचा असल्याचे सांगितले. वाहक एकनाथ देवराम माळी (जामनेर) यांनी त्याच्याकडील आधार कार्ड आपल्याकडील यंत्राच्या साह्याने तपासले असता ते बनावट कार्ड असल्याचे उघड झाले.
वाहकाने ते कार्ड जप्त केले. त्यामुळे संतापून त्या प्रवाशाने व त्याच्या सहकाऱ्याने वाहकाला दमदाटी करत मारहाण करायला सुरुवात केली. हा प्रकार चालक संजय भगवान एगडे यांच्या लक्षात आल्याने त्यांनी बस सरळ बोदवड पोलिस ठाण्याकडे वळवली. त्यावेळी मारहाण करणाऱ्या एकाने चालू बसमधून उडी मारत पळ काढल तर एकाला पोलिस ठाण्यात आणले.
मारहाण करणाऱ्या व्यक्तीच्या बोदवडमधील नातलगांनी पोलिस ठाणे गाठले व वाहकाची माफी मागून हे प्रकरण मिटवण्याची विनंती केली. त्यावेळी वाहकाने मारहाण करणारी व्यक्ती आपल्या बापाच्या वयाची असल्याची भावना व्यक्त केली. यापुढे असे करू नका, असे सांगून प्रकरण मिटवले. पोलिसांनी या घटनेची नोंद नियमाप्रमाणे घेतली.
