परभणी (वृत्तसंस्था) बहीण नांदावयास नेत नसल्याच्या कारणावरून मेहुण्यास बेदम मारहाण केल्याची घटना जिंतूर शहरातील बलसा रस्त्यावर गुरूवारी (दि. ५) रोजी सकाळी १० वाजेच्या सुमारास घडली. या मारहाणीत गंभीर जखमी मेहुण्यास पुढील उपचारासाठी जिल्हा रुग्णालयात हलविण्यात आले आहे.
शहरातील बलसा रोड भागात राहणारे सय्यद अझर सय्यद अफसर यांचे लग्न शेख इद्रिस यांच्या मुलीसोबत ९ वर्षांपूर्वी झाले होते. दोन वर्षांपासून सय्यद अझर याचे शहरातील एका महिलेशी अनैतिक संबंध असल्याचे त्यांच्या पत्नीच्या निदर्शनास आले होते. म्हणून त्यांची पत्नी माहेरी आली. पती चांगला नांदवत नसल्याबाबत जिंतूर पोलीस ठाण्यात अर्जही दिला आहे. त्यामुळे नेहमी त्यांच्यात वाद होत असत.
गुरूवारी (दि.५) सकाळच्या सुमारास सय्यद अझर व शेख मुखीद, शेख मोईज यांच्यात शाब्दिक चकमक झाली. त्याचे रूपांतर हाणामारीत झाले. यावेळी दोन्ही भावांनी मिळून सय्यद अझर यास लोखंडी रॉडने मारहाण केली. या मारहाणीत त्याच्या दोन्ही पायाची हाडे मोडली गेली. तर भांडण सोडविण्यास गेलेले शेख सलीम शेख गुलाब यांनाही जबर मार लागला.
परिसरातील नागरिकांनी भांडण सोडवून सय्यद अझरला शहरातील ग्रामीण रुग्णालयात उपचारासाठी दाखल केले. त्यात सय्यद अझर याची प्रकृती गंभीर असल्याने त्यास पुढील उपचारांसाठी जिल्हा सामान्य रुग्णालयात पाठविण्यात आले. याबाबतचे वृत्त आज एका दैनिकाने दिले आहे.
