अमळनेर (प्रतिनिधी) भाजपच्या अँड. ललिता पाटील यांनी लोकसभा निवडणुकीच्या पार्श्वभूमीवर शिवसेना पक्षप्रमुख उद्धव ठाकरे यांची भेट घेतल्यामुळे राजकीय वर्तुळात प्रचंड खळबळ उडाली आहे.
तत्कालीन काँग्रेसच्या प्रदेश सरचिटणीस अँड. ललिता पाटील यांनी आपले पुत्र तथा युवक कॉग्रेसचे तत्कालीन जिल्हाध्यक्ष पराग पाटील यांच्यासोबत जामनेर येथे साधारण चार वर्षापूर्वी भाजपात प्रवेश केला होता. यावेळी मंत्री गिरीश महाजन यांनी त्यांचे भाजपात स्वागत होते.
अँड. ललिता पाटील ह्या भाजपकडून लोकसभेसाठी इच्छुक होत्या. परंतू आज अचानक त्यांनी उद्धव ठाकरे यांची भेट घेतल्यामुळे राजकीय वर्तुळात प्रचंड खळबळ उडाली. दरम्यान, ललिता पाटील यांनी उद्धव ठाकरे यांच्याकडे जळगाव लोकसभा मतदार संघात निवडणूक लढविण्याची इच्छा व्यक्त केली. यावेळी दोघांमध्ये सकारात्मक चर्चा झाल्याचे कळते. यावेळी शिवसेनेचे सहसंपर्क प्रमुख गुलाबराव वाघ, जिल्हा प्रमुख विष्णू भंगाळे, कुलभूषण पाटील,धरणगावचे माजी लोकनियुक्त नगराध्यक्ष निलेश चौधरी, नाना महाजन, दशरत महाजन, शरद तायडे हे देखील उपस्थित होते. आगामी काळात उद्धव ठाकरे नेमकी काय भूमिका घेतात?, याकडे सर्वांचे लक्ष लागून आहे.
आज जळगाव लोकसभा मतदार संघातील सर्व पदाधिकाऱ्यांची उद्धव ठाकरे साहेबांसोबत बैठक होती. यावेळी अनेकांनी लोकसभा निवडणूक लढण्याची इच्छा व्यक्त केली. उद्धव साहेब जो निर्णय घेतील, तो आम्हा सर्वांना मान्य राहील. तसेच जो उमेदवार साहेब देतील त्याचं आम्ही सर्व जण एकदिलाने काम करू !
-गुलाबराव वाघ ( सहसंपर्क प्रमुख, जळगाव लोकसभा मतदार संघ)
