मुंबई (वृत्तसंस्था) अंधेरी पोटनिवडणुकीच्या पार्श्वभूमीवर शिवसेनेच्या निवडणूकचिन्हाची लढाई निवडणूक आयोगाच्या दारात सुरु झाली आहे. निवडणूक आयोगानं आता ठाकरे गटाला उद्या दुपारी 2 पर्यंत ठाकरे गटाला मुदत दिली आहे. दुपारी दोन वाजेपर्यंत त्यांना उत्तर सादर करावे लागणार आहे. तर दुसरीकडे शिंदे गटानं धनुष्यबाण चिन्हावर अधिकृत दावा केला आहे. या संदर्भात शिंदे गटाकडून निवडणूक आयोगाला प्रतिज्ञापत्र सादर करण्यात आले आहे. या प्रतिज्ञापत्रात शिवसेना पक्षअध्यक्ष पदाचा उल्लेख करण्यात आला आहे.
शपथपत्रांनी भरलेली कार दिल्लीतील निवडणूक आयोगामध्ये पोहोचली
शिवसेना पक्ष नेमका कुणाचा आणि धनुष्यबाण चिन्ह कुणाला मिळणार याचा निर्णय आता केंद्रीय निवडणूक आयोग ठरवणार आहे. यासाठी दोन्ही पक्षांना आपली बाजू मांडण्यासाठी मुदत देण्यात आली होती. या मुदतीनुसार आज शिंदे गटाकडून शपथपत्रांचे गठ्ठेच्या गठ्ठे निवडणूक आयोगात सादर करण्यात आले आहेत. शपथपत्रांनी भरलेली एक कार आज दिल्लीतील निवडणूक आयोगामध्ये पोहोचली आणि शिंदे गटाकडून जवळपास ७ लाख सदस्यांची शपथपत्र निवडणूक आयोगाला सुपूर्द करण्यात आल्याची प्राथमिक माहिती समोर आली आहे. या पत्रामध्ये शिवसेनेच्या पक्षअध्यक्ष पदावर शिंदे यांच्या वतीने दावा करण्यात आल्याची माहिती समोर आली आहे. त्यामुळे पक्षाबरोबरच पक्षअध्यक्ष पदही शिंदे ताब्यात घेण्याच्या प्रयत्नात दिसून येत आहे. आता निवडणूक आयोग शिवसेना कोणाची याचा निर्णय लवकर घेण्याची शक्यता देखील वर्तवण्यात येत आहे.
ठाकरे गटाला उद्या दुपारी २ वाजेपर्यंतची अंतिम मुदत
दुसरीकडे ठाकरे गटाकडून कागदपत्रं सादर करण्यासाठी मुदतवाढीची मागणी करण्यात आली होती. पण निवडणूक आयोगानं आता ठाकरे गटाला उद्या दुपारी २ वाजेपर्यंतची अंतिम मुदत दिली आहे. त्यामुळे ठाकरे गटाला आता पुढच्या २१ तासांत कागदपत्र निवडणूक आयोगासमोर सादर करावी लागणार आहेत. दुसरीकडे आपल्या बाजूनं 40 आमदार, 12 खासदार, 144 पदाधिकारी, 11 राज्यप्रमुख असल्याचा दावा शिंदे गटानं आयोगासमोर केलेला आहे. सोबतच 1 लाख 66 हजार 764 प्राथमिक सदस्यत्वांची शपथपत्रंही सादर करण्यात आलीत.
ठाकरे गटानं आज पहिल्यांदाच आपलं प्राथमिक लेखी निवेदन आयोगात केलं सादर
आजवर दोनवेळा मुदतवाढ मागणाऱ्या ठाकरे गटानं आज पहिल्यांदाच आपलं प्राथमिक लेखी निवेदन आयोगात सादर केलं. शिंदे गटाची कागदपत्रं आम्हाला अद्याप मिळालेली नाहीत अशी तक्रार करत ठाकरे गटानं आज निवडणूक आयोगात आपली बाजू मांडली. बाजू मांडण्यासाठी ठाकरे गटाला आज शेवटची मुदत होती. पक्षावर अजूनही आमचं वर्चस्व आहे हे सांगतानाच सविस्तर कागदपत्रं सादर करण्यासाठी आपल्याला किमान 15 ते 20 दिवसांचा वेळ मिळावा ही मागणी ठाकरे गटानं केली होती. मात्र त्यांना उद्यापर्यंतची मुदत देण्यात आली आहे.
