बुलढाणा (प्रतिनिधी) जालना येथून नातलगाचा लग्नसोहळा आटोपून घराकडे परतत असताना झालेल्या अपघातात देऊळगाव राजा तालुक्यातील पिंपळगाव बुद्रुक येथील पती-पत्नी जागीच ठार झाले. सुदैवाने या अपघातात मुलगा बचावला आहे.
तालुक्यातील जळ पिंपळगाव येथील भगवान भानुदास काकड (वय वर्ष ४५), कासाबाई भगवान काकड आणि त्यांचा मुलगा समाधान काकड हे लग्नासाठी जालना येथे गेले होते. मात्र १७ मार्च रोजी रात्री १० वाजेच्या लग्नाहून घरी परत येत असताना काकड हे प्रवास करत असलेल्या पिकअप वाहनासोबत देऊळगाव राजा बायपासजवळ विचित्र अपघात घडला. पिकअपच्या मागील लोखंडी केबिन मागच्या मागे घसरून हा अपघात घडला. सदर अपघातात वाहनाच्या लोखंडी केबिनमध्ये मागे बसलेल्या कासाबाई भगवान काकड या जागीच ठार झाल्या, तर त्यांचे पती भगवान भानुदास काकड हे गंभीर जखमी झाले. त्यांना उपचारासाठी जालना येथे हलविण्यात आले. परंतू वाटेतच त्यांचेही निधन झाले. या अपघातावेळी काकड यांचा मुलगा समाधान हा पुढे चालकाच्या बाजूला बसला असल्याने त्याचा जीव वाचला आहे.
