मुंबई (वृत्तसंस्था) मराठी भाषा दिनानिमित्त महाराष्ट्र नवनिर्माण सेनेच्यावतीने मराठी स्वाक्षरी कार्यक्रमाचं आयोजन करण्यात आलं होतं. मात्र, कोरोनाच्या वाढत्या प्रादुर्भावाच्या पार्श्वभूमीवर राज्य सरकारनं मनसेच्या कार्यक्रमांना परवानगी नाकारली. सरकारच्या निर्णयावर मनसेचे अध्यक्ष राज ठाकरे यांनी संताप व्यक्त केला. सरकारच्या कार्यक्रमांना गर्दी होते ते चालतं पण शिवजंयती आणि मराठी भाषा दिनाच्या दिवसाला परवानगी नाकारता, अशा शब्दात राज यांनी संताप व्यक्त केला.
आज मराठी भाषा दिनाच्या निमित्ताने महाराष्ट्र नवनिर्माण सेनेने ‘मराठीत करा स्वाक्षरी’ ही मोहिम सुरू केली होती. मात्र कोरोनाचा वाढता प्रादुर्भाव पाहता या कार्यक्रमाला पोलिसांनी परवानगी नाकारली होती. मात्र तरीही मनसे आणि राज ठाकरेंनी हा कार्यक्रम केला. हा कार्यक्रम शिवाजी पार्क येथे पार पडला. यावेळी राज ठाकरेंनी मराठीत स्वाक्षरी केली. मराठी भाषा जपण्यासाठी हे पाऊल उचलायलाच हवे. ‘सगळ्यांनीच सगळ्या ठिकाणी मराठीत स्वाक्षरी करा’, असा सल्ला राज ठाकरेंनी दिला आहे. सरकारच्या कार्यक्रमांना गर्दी होते ते चालतं पण शिवजंयती आणि मराठी भाषा दिनाच्या दिवसाला परवानगी नाकारता, असा सवाल मनसे अध्यक्ष राज ठाकरेंनी विचारला आहे. तसेच कोरोनाची एवढी भीती वाटते तर मग निवडणुका पुढे ढकला? असा सल्ला देखील राज ठाकरेंनी यांनी दिला आहे. तसेच कोरोनाचा प्रादुर्भाव पाहता पत्रकारांनी आपण मास्क का घालत नाही? असा सवाल विचारला त्यावर राज ठाकरे म्हणाले,’मी मास्क कधीच घालत नाही. तुम्ही पण नका घालू’, असा सल्ला पत्रकारांना दिला.
मराठी स्वाक्षरी मोहिमेबद्दल बोलताना राज ठाकरे यांनी जनतेलाही आवाहन केलं. “मला असं वाटतं की स्वाक्षरीची मोहीम पहिल्यांदाच होत नाहीये. फक्त यावेळी मोठ्या प्रमाणात करण्याचं ठरवलं. माझी मराठीजनांना विनंती आहे की, आपली स्वाक्षरी मराठीत केली तर मराठीतून काहीतरी करतो हे मनात राहतं. मी सगळीकडे मराठीत सही करतो. प्रत्येक वेळेस आसवं गाळत बसण्यापेक्षा सुरूवात करणं गरजेचं आहे. दाक्षिणात्य माणसांबद्दलच नाही. सगळ्यांबद्दल बघा. दोन गुजराती जेव्हा एकत्र येतात.. तेव्हा ते गुजरातीमध्ये बोलतात. मराठी येतात तेव्हा ते अनेकदा हिंदीमध्ये बोलतात,” असं म्हणत राज ठाकरेंनी नाराजी व्यक्त केली.
या कार्यक्रमाला मराठी कलाकार देखील उपस्थित होते. यावेळी अभिनेते संजय मोने, अभिनेत्री सायली संजीव, दिग्दर्शक -गायक अवधुत गुप्ते, अभिनेता अतुल परचुरे यासारखे कलाकार उपस्थित होेते. या कलाकारांनी देखील येथे मराठी स्वाक्षऱ्या केल्या.
