जळगाव (प्रतिनिधी) भाईचंद हिराचंद रायसोनी (बीएचआर) पतसंस्थे मधील गैरव्यवहाराशी संबंधीत संशयित आरोपी सुनील झंवरसह इतर संशयितांच्या शोधाचा रोख नाशिकच्या दिशेने सुरू असल्याचे कळते.
जळगावात सुनिल झंवर यांचे कार्यालय, बीएचआर संस्थेचे मुख्य कार्यालय तसेच संशयितांच निवासस्थाने येथून कागदपत्रांची तपासणी व हस्तगत करण्याचे काम सुरुच आहे. दुसरीकडे या गुन्ह्यात नावे वाढविलेल्या संस्थेचे अवसायक जितेंद्र कंडारे, प्रकाश वाणी, कुणाल शहा, सुनील झंवर, योगेश सांखला व माहेश्वरी यांचा देखील शोध सुरु आहे. यांच्या शोधाचा रोख नाशिक व त्र्यंबकेश्वरकडे असल्याचे समजते. दरम्यान, पोलिसांनी नाशिक जिल्ह्यात नाकेबंदी केली असल्याचेही कळते. गीते आणि बोरा नामक व्यक्तींकडे पोलिसांच्या पथकाने चौकशी केल्याचेही कळते.
