जळगाव (प्रतिनिधी) येथील तंत्रनिकेतन महाविद्यालयात सुरू असलेल्या कोविड सेंटरमध्ये रुग्णांना जेवणासंबंधित समस्या असल्याच्या अनेक तक्रारी नगरसेवक कैलास सोनवणे यांना प्राप्त झाल्या होत्या. त्यानंतर त्यांनी तिथे जाऊन पाहणीही केली. त्यामुळे आज महापौर जयश्री महाजन व उपमहापौर कुलभूषण पाटील यांनी तंत्रनिकेतन महाविद्यालयातील कोविड सेंटरला भेट दिली.
यावेळी रुग्णांमार्फत जेवणाचा दर्जा खालावला जात असल्याची तक्रार आलीच नाही, असे तिथल्या डॉक्टरांनी सांगितले. महापौर व उपमहापौर यांनी स्वतः जेवणाचे पॅकेट्स तपासून पाहिले. रुग्णांना दिले जाणारे जेवण हे अत्यंत उत्तम दर्जाचे असल्याचे समोर आले.
महापौर व उपमहापौर यांनी कोविड सेंटर मधील रुग्णांशी संवादही साधला. जेवनासंबंधी तुम्हाला काही समस्या आहेत का ..? असे विचारले असता रुग्णांनी आम्हाला जेवण वेळेवर व अत्यंत चांगल्या प्रतीचे मिळत असल्याचे सांगितले.
उपमहापौर कुलभूषण पाटील यांनी म्हणाले की, जर तुम्हाला काही समस्या असल्यास तुम्ही येथील या डॉक्टरांशी अथवा समन्वयकांशी किंवा आमच्याशी संपर्क साधावा. तक्रारींचे लगेच निवारण करण्यात येईल आणि यामध्ये जर काही समस्या असतील तर दोषींना पाठिशी घातले जाणार नाही, असेही यावेळी उपमहापौर कुलभूषण पाटील यांनी सागितले. यावेळी नगरसेवक नवनाथ दारकुंडे, चेतन सनकत, कुंदन काळे, हर्षल मावळे, नरेश सोनवणे, अजय देशमुख आदी उपस्थित होते.
