चाळीसगाव (प्रतिनिधी) बसमधून उतरत असलेल्या महिलेची सोन्याच्या दागिने असलेली पर्स लांबवताना नागरीकांनी पाठलाग करून सिल्लोडच्या चोरट्या तीन महिलांना पकडून चाळीसगाव शहर पोलिसांच्या स्वाधीन केले. ही घटना खरजई नाक्यावर शनिवारी दुपारी दोन वाजता घडली.
आशा समाधान चौधरी (28, मालेगाव, जि.नाशिक) ही विवाहिता खरजई नाक्यावर बसमधून खाली उतरत असताना तीन भामट्या महिलांनी विवाहितेकडील पर्स बळजबरीने हिसकावून पळ काढला. पर्समध्ये 26 हजारांचा सोन्याचे दागिने होते. त्चायामुळे महिलेने आरडा-ओरड केल्यानंतर काही नागरिकांनी भामट्या महिलांचा पाठलाग करून त्यांना पकडले. त्यानंतर या घटनेची माहिती चाळीसगाव शहर पोलिसांनाकळवण्यात आली.
संशयित महिलांना ताब्यात घेवून पोलीस ठाण्यात आणण्यात आले असता चौकशीत संशयितांनी आपले नाव संगीता रमेश म्हसंजोगी (30), ईश्वरी मल्याडू म्हसंजोगी (35) व शिरीषा राघो म्हसंजोगी (25, सर्व रा.पाण्याच्या टाकीजवळ, सिल्लोड. जि.छत्रपती संभाजीनगर) असे सांगितले. याप्रकरणी आशा चौधरी यांच्या फिर्यादीवरून तिघां महिलांविरुद्ध गुन्हा दाखल करण्यात असून पुढील तपास पोलीस निरीक्षक संदीप पाटील यांच्या मार्गदर्शनाखाली उपनिरीक्षक सुहास आव्हाड हे करीत आहेत.
