चाळीसगाव (प्रतिनिधी) तालुक्यातील रांजणगाव शिवारातील एका विहिरीत दोन चिमुकल्यांसह आईचा मृतदेह मिळून आल्याने परिसरात प्रचंड खळबळ उडाली आहे. इला मनोज पावरा (वय २५) व त्यांची दोन्ही मुले महेश मनोज पावरा (वय ११ महिने) व रितेश मनोज पावरा (वय ५) असे मृतांची नावे आहेत.
शिरपूर येथील मनोज भटू पावरा हे पत्नी इला व मुले महेश व रितेश यांच्यासह गेल्या चार वर्षांपासून रांजणगाव येथे कुटुंबासह वास्तव्यास आहेत. मंगळवारी (दि.२८) रात्री महेश पावरा या बालकाचा मृतदेह विहिरीत तरंगताना आढळून आला. या घटनेची माहिती मिळाल्यानंतर चाळीसगाव ग्रामीण पोलिसांनी घटनास्थळी धाव घेतली. तसेच महेश याचा मृतदेह ग्रामीण रूग्णालयात आणला. त्याचवेळी इला पावरा व त्यांचा दुसरा मुलगा रितेश हेदेखील बेपत्ता होते. ज्या विहीरीत महेश याचा मृतदेह आढळून आला, त्या विहिरीला पाणी भरपूर होते. त्यामुळे स्थानिक नागरीकांच्या मदतीने दुसऱ्या दिवशी बुधवारी दि. २९ रोजी दिवसभर, विहीरीचे पाणी उपसल्यानंतर रात्री विहीरीत इला पावरा व रितेश पावरा यांचे मृतदेह हाती लागले. दरम्यान, तिघा मायलेकांच्या मृत्युचे नेमके कारण अद्याप समोर आलेले नाहीय.
