चाळीसगाव (प्रतिनिधी) सासरा व सुनेत झालेल्या घरगुती वादात सासऱ्याने सुनेचा रुमालाने गळा, नाक व तोंड दाबून तिला जीवे ठार मारल्याची घटना चाळीसगाव तालुक्यातील टाकळी प्र. चा. येथील शिवशक्ती नगरात शुक्रवारी रात्री घडली. या घटनेनंतर सासरा उत्तम पुंजाजी चौधरी हा स्वतःहून पोलिसात हजर झाला.
काही दिवसांपासून सुरु होता कौटुंबिक वाद
चाळीसगाव तालुक्यातील टाकळी प्र. चा. येथील रहिवासी उत्तम पुंजाजी चौधरी यांचा मुलगा प्रा. गोकुळ उत्तम चौधरी यांचा विवाह शिरपूर तालुक्यातील टेकवाडे येथील कविता यांच्याशी झाला होता. सून व सासरच्या लोकांचे काही दिवसांपासून कौटुंबिक वाद सुरू होते. २९ सप्टेंबर रोजी पती गोकुळ कवितास आणण्यासाठी टेकवाडे येथे गेला. रात्री ९ वाजता ते मुलांसह चाळीसगावला आले.
दोन्ही हातांनी गळा, नाक व तोंड दाबून जीवे ठार मारले
शुक्रवारी सायंकाळी साडेपाच वाजेच्या सुमारास उत्तम चौधरी घरी आले. त्यांनी सून कवितास चहा करण्यास सांगितले. चौधरी चहा घेत टीव्ही पाहत असताना सायंकाळी ५.३० वाजता कविता आली व तिने टीव्ही बंद करून तुम्हाला येथे बसून लाज वाटत नाही का, असे बोलली. त्याचा चौधरी यांना राग आला. ते तिच्या मागोमाग बेडरूममध्ये गेले. कवितास बेडवर ढकलून दोन्ही हातांनी तिचा गळा, नाक व तोंड दाबून तिला जीवे ठार मारले. सासरे उत्तम चाैधरी स्वत:च रिक्षातून शहर पाेलिस ठाण्यात गेले व त्यांनी गुन्ह्याची कबुली दिली. सून कविता हिचे सोबत नेहमी होत असलेल्या कौटुंबिक वादाच्या कारणावरून मी तिला जीवे ठार मारल्याचे पाेलिसांना सांगितले.
