चंद्रपूर (वृत्तसंस्था) बनावट आयकर रिटर्न तयार करून चंद्रपूर जिल्ह्यात वेगवेगळ्या बँकेच्या कार्यक्षेत्रात 11 कर्जधारकांनी 14 कोटी 26 लाखांच्या गृहकर्जाची उचल केली आहे. बँकेच्या वरिष्ठ अधिकाऱ्यांनी केलेल्या मूल्यांकनामध्ये वाजवीपेक्षा अधिक गृहकर्जे देण्यात आल्याचे निष्पन्न झाल्याने जिल्ह्यातील स्टेट बँक ऑफ इंडिया बँकेच्या 3 अधिकाऱ्यांसह 11 कर्जधारक आणि 1 एजंटला फसवणूक केल्याप्रकरणी रामनगर चंद्रपूरच्या आर्थिक गुन्हे शाखेनं अटक केली आहे.
अटक झालेल्यांमध्ये शाखा व्यवस्थापक देविदास कुळकर्णी, लोन प्रोसेसिंग अधिकारी विनोद लाटेलवार आणि पंकजसिंह सोलंकी यांचा समावेश आहे. या सोबतच गणेश नैताम या एजंट सह 11 मालमत्ता धारकांना देखील अटक कऱण्यात आली आहे. बँकेच्या या फसवणूक प्रकरणात आरोपींनी बनावट आयकर रिटर्न तयार करून आणि मालमत्तांचे जास्त मूल्यांकन दाखवून 44 प्रकारणांमध्ये 14 कोटी 26 लाखांचे कर्जवाटप केले होते. मात्र, हे सर्व कर्ज एनपीए झाल्यानं राष्ट्रवादी काँग्रेसचे शहाराध्यक्ष राजीव कक्कड यांनी 2 वर्षाआधी केंद्रीय वित्तमंत्री निर्मला सीतारामन यांच्या कडे याबाबत तक्रार केली होती.
त्याच आधारावर या सर्व प्रकरणाची चौकशी करण्यात आली. मुख्य म्हणजे ज्या लोकांना हे कर्ज देण्यात आले ते कर्जदार अतिशय गरीब आणि सर्वसामान्य असल्याची माहिती सूत्रांनी दिली आहे. त्यामुळे या लोकांचे खोटे आयकर रिटर्न तयार करून त्यांच्या नावे काही मोठ्या प्रॉपर्टी डीलर्स नी कर्जाची ही रक्कम हडप केल्याची दाट शक्यता आहे. त्यामुळे या प्रकरणात बँकेचे आणखी काही अधिकारी आणि प्रॉपर्टी डीलर्स यांना देखील अटक होण्याची शक्यता आहे.
