जळगाव (प्रतिनिधी) महाराष्ट्र राज्य बुध्दिबळ संघटना आयोजित जळगाव जिल्हा बुद्धिबळ संघटना व जैन स्पोर्ट्स अकॅडमी यांच्या संयुक्त विद्यमाने येत्या २७ ते ३० डिसेंबर पर्यंत कनिष्ठ वयोगटातील बुद्धिबळ राज्य निवड चाचणी स्पर्धेचे आयोजन करण्यात आले आहे.
सदर स्पर्धा २० वर्षांखालील मुले व मुली अशा स्वतंत्र गटात खेळवली जाईल. जानेवारी २०२२ मध्ये दिल्ली येथे आयोजित राष्ट्रीय कनिष्ठ वयोगटातील स्पर्धेसाठी महाराष्ट्राच्या संघाची निवड या स्पर्धा प्रक्रियेद्वारे करण्यात येणार आहे. सदरहू आंतरराष्ट्रीय मानांकन स्पर्धा अखिल भारतीय बुद्धिबळ महासंघ व महाराष्ट्र राज्य बुद्धिबळ संघटना यांच्या मान्यतेने आणि मार्गदर्शनाखाली होत आहेत. या चाचणी स्पर्धेत तब्बल ४० हजार रकमेची रोख पारितोषिके व ट्रॉफी विजेत्यांना वितरीत केली जाणार आहेत. प्रथमच मुलींना बक्षीस रकमेचे समान वाटप करीत राज्य संघटना बुद्धिबळ क्षेत्रात नवनवीन पायंडे घालीत आहे.
जळगाव रेल्वे स्टेशन जवळील खानदेश सेंट्रल मॉल येथे या स्पर्धेचे आयोजन केले असून, मुलांच्या व मुलींच्या गटातील प्रथम चार खेळाडूंना महाराष्ट्र राज्याचे प्रतिनिधित्व करण्याची संधी प्राप्त होणार आहे. जिल्हा पातळीवर निवड झालेल्या खेळाडूंची राहण्याची मोफत सोय जळगाव संघटनेमार्फत केली जाणार असुन राज्यभरातील खेळाडूंना आंतरराष्ट्रीय मानांकन स्पर्धा खेळण्याची नामी संधी या निमित्ताने लाभली आहे. नवोदित व गुणी खेळाडूंना या स्पर्धा जिल्हा पातळीवर अनुभवयास मिळणे म्हणजे पर्वणी असून अशा स्पर्धांमधून ग्रँडमास्टर बनण्याच्या वाटचालीची संधी ग्रामीण खेळाडूंना या स्पर्धेनिमित्ताने लाभत असते.
महाराष्ट्र बुद्धिबळ संघटनेचे माजी अध्यक्ष अशोक जैन, जिल्हा संघटनेचे अध्यक्ष अतुल जैन, राज्य संघटनेचे खजीनदार तथा राज्यस्तरीय स्पर्धा समिति सचिव फारूक शेख, जळगाव जिल्हा संघटनेचे सचिव नंदलाल गदिया, राज्यस्तरीय आर्बिटर समिति सचिव प्रवीण ठाकरे यांच्या मार्गदर्शन खाली या स्पर्धा होत असून बुद्धिबळ द्वंद्व पटावर दिसावे व कोविड नियमांचे पालन करून खेळाडू बुद्धिबळ स्पर्धेत सहभागी व्हावेत या साठी जिल्हा बुद्धिबळ संघटना प्रयत्नशील असल्याचे सचिव नंदलाल गदिया यांनी एका पत्रकाद्वारे कळविले आहे.
