चोपडा (प्रतिनिधी) येथील महात्मा गांधी शिक्षण मंडळ संचलित, कला,शास्त्र व वाणिज्य महाविद्यालयातील वाणिज्य व व्यवस्थापन विभागातर्फे ‘जागतिक ग्राहक दिना’ निमित्त ‘पोस्टर प्रेझेंटेशनचे’ आयोजन करण्यात आले होते. या कार्यक्रमाचे प्रमुख पाहुणे म्हणून ॲड.निर्मल देशमुख हे उपस्थित होते. या कार्यक्रमाच्या अध्यक्षस्थानी महाविद्यालयाचे प्राचार्य डॉ.डी.ए. सूर्यवंशी उपस्थित होते.
याप्रसंगी वाणिज्य विभागाचे उपप्राचार्य एन.एस. कोल्हे,माजी उपप्राचार्य एम.बी.हांडे उपस्थित मान्यवर उपस्थित होते. या कार्यक्रमाचे प्रास्ताविक करतांना वाणिज्य विभागप्रमुख डॉ.सी.आर.देवरे यांनी कार्यक्रमाची रूपरेषा व कार्यक्रमाचा उद्देश स्पष्ट केला. यावेळी ते म्हणाले की, ‘विद्यार्थ्यांमध्ये प्रति ग्राहक संरक्षण कायद्याबद्दल जागरुकता निर्माण होणे गरजेचे आहे’.
यावेळी प्रमुख पाहुणे ऍड.निर्मल देशमुख यांनी ग्राहक संरक्षण कायद्यासंदर्भात समाजात जागरूकता व त्याबद्दलची माहिती देताना ग्राहक संरक्षण कायद्याविषयी विद्यार्थ्यांना मार्गदर्शन केले. यावेळी ते म्हणाले की, ‘ग्राहकांनी ग्राहक अधिकारांच्या बाबत जागरूक राहिले पाहिजे व ऑनलाईन पद्धतीने वस्तू विकत घेताना तसेच बाजारपेठेमध्ये वस्तू विकत घेत असताना किंवा वेगवेगळ्या सेवा घेत असताना कोणत्याही गोष्टीसंदर्भात जागरूक राहिले पाहिजे’.यावेळी त्यांनी एखाद्या ठिकाणी अडचण निर्माण झाल्यास त्या विक्रेत्याच्या विरोधात कोणत्या ठिकाणी दाद मागावी व त्याची प्रक्रिया कशा प्रकारची असते, ग्राहक संरक्षण कायद्यातील नवीन अमेंडमेंटस व कायद्यातील बदल याबद्दल विद्यार्थ्यांना मार्गदर्शन केले.
याप्रसंगी अध्यक्षीय मनोगत व्यक्त करतांना महाविद्यालयाचे उपप्राचार्य प्रा.एन एस कोल्हे म्हणाले की, ‘जागतिक ग्राहक दिना’निमित्ताने विद्यार्थ्यांनी सर्व रुपी माहितीचे ज्ञान करून घेणे गरजेचे आहे तसेच विद्यार्थ्यांसमोर असलेल्या विविध अडचणी आणि ग्राहकांसमोर असलेल्या विविध अडचणी या संदर्भात ग्राहकांनी कोणत्या ठिकाणी दाद मागावी हे समजून घेणे आवश्यक आहे. याविषयावर विद्यार्थ्यांनी उत्तम प्रकारचे पोस्टर प्रेझेंटेशन केले त्याबद्दल त्यांनी कौतुक व समाधान व्यक्त केले. या पोस्टर प्रदर्शनात ३५० विद्यार्थ्यांनी सहभाग घेतला होता. या कार्यक्रमात परीक्षकांनी पोस्टर प्रदर्शनाचे निरीक्षण केले व विद्यार्थ्यांचे कौतुक केले. याप्रसंगी उत्कृष्ट पोस्टर सादरीकरण केलेल्या प्रथम,द्वितीय व तृतीय क्रमांक प्राप्त विद्यार्थ्यांना पारितोषिके देऊन गौरविण्यात आले.
या कार्यक्रमाचे सूत्रसंचालन आर.पी. जैस्वाल यांनी केले तर आभार ए. एच.साळुंखे यांनी मानले. सदर कार्यक्रमास अर्थशास्त्र विभाग प्रमुख व्ही. पी हौसे, एस. बी. पाटील, डॉ. गोपाल पाटील आदि उपस्थित होते. या कार्यक्रमाच्या यशस्वीतेसाठी विभागातील एच.ए.सूर्यवंशी, पी.एस. जैन, पी. पी. कासार, के. एन.सोनार, जी.आय.पिंगळे, सी.पी.बाविस्कर, जी. जे. पटेल यांनी परिश्रम घेतले. या कार्यक्रमाप्रसंगी महाविद्यालयातील शिक्षक-शिक्षकेतर कर्मचारी बंधू-भगिनी तसेच बहुसंख्य विद्यार्थी उपस्थित होते.
