चोपडा (प्रतिनिधी) चोपडा बस स्थानकातून सकाळी 11 वाजता निघालेल्या चोपडा-नाशिक बस क्रमांक (एम एच 14 बी.टी 2142) ही खड्डा चुकविण्याच्या नादात सुत गिरणीत जाऊन पाण्याच्या कुंड्याला धडकली. या अपघातात सुदैवाने प्रवाशांसह वाहक, चालक थोडक्यात बचावले. हा अपघात सकाळी 11 ते 11:20 च्या दरम्यान झाला.
चोपडा-नाशिकमध्ये जवळपास 60 ते 65 प्रवासी होते. चालक विनोद भास्कर कोळी हे नेहमी प्रमाणे बस घेऊन निघाले. परंतू तापी सूत गिरणी जवळ रस्त्याला मोठा खड्डा असल्याकारणाने चालकाच्या बसवरील ताबा सुटला. यामुळे ती सरळ सुत गिरणीत जाऊन एका झाडाला धडक देताच तेथील फाउंटनच्या पाण्याचा कुंड्याला धडकली. सुदैवाने या अपघातात एकही प्रवासी जखमी झाला नाही.
यावेळी तात्काळ घटनास्थळी बस स्थानकातले प्रमुख चंद्रभान रायसिंग, प्रभाकर महाजन ,अशोक पाटील, यांच्यासह काही लोकांनी भेटी दिल्या. दरम्यान, सार्वजनिक बांधकाम विभागाने लक्ष देऊन मोठं मोठे खड्डे तरी बुजावावेत अशी मागणी होत आहे. यावेळी वाहक सचिन गुलाबराव कदम हे देखील सोबत होते. याबाबत चोपडा शहर पोलीस स्टेशनला चालक विनोद भास्कर कोळी हे स्वतः फिर्याद देण्यासाठी गेले असल्याचे कळते.
