जळगाव (प्रतिनिधी) शिवाजीनगर परिसरातील नगरसेवक नवनाथ दारकुंडे यांचा काही तरुणांसोबत आज दुपारी १२ च्या सुमारास वाद झाला. वादाचे पर्यावसन हाणामारीत झाल्याने एका तरुणाचे डोके फुटले असून नगरसेवक नवनाथ दारकुंडे हे देखील जखमी झाले आहेत. दरम्यान, दोन्ही गट तक्रार करण्यास शहर पोलिसात आले असता पोलिसांसमोरच पुन्हा हाणामारी झाली.
यासंदर्भात अधिक असे की, शिवाजीनगर परिसरात असलेल्या लाकूड पेठेत नगरसेवक नवनाथ दारकुंडे यांचा दुपारी १२ वाजेच्या सुमारास महेश सदाशिव पवार याच्यासह काही तरुणांसोबत वाद झाला. हाणामारीत महेश पवार याच्या डोक्याला दुखापत झाली असून तोंड फुटले आहे. नवनाथ दारकुंडे यांना देखील दुखापत झाली आहे. दरम्यान, शिवाजीनगरात असलेला जुना जकात नाका तोडण्यावरून हा वाद झाला असून त्याठिकाणी अवैध दारू विक्री होत होती असे समजते. दरम्यान, दोन्ही गट तक्रार करण्यास शहर पोलिसात आले असता पोलिसांसमोरच पुन्हा हाणामारी झाली. तक्रार दाखल करण्याचे काम सुरू आहे.
