नाशिक (वृत्तसंस्था) मस्ती करतो म्हणून औरंगाबाद येथील पाच वर्षीय चिमुरड्याला गरम तव्याचे चटके देण्यात आल्याचा धक्कादायक प्रकार शहरातील आगरटाकळी येथे घडला. याबाबत उपनगर पोलीस ठाण्यात गुन्हा दाखल करण्यात आला आहे.
आरती सदावर्ते आणि विजय सदावर्ते (रा. समतानगर) अशी पोलिसांनी ताब्यात घेतलेल्या संशयितांची नावे आहेत. याबाबत चाइल्डलाइन सुपरवायझर सायली चौधरी यांनी फिर्याद दाखल केली आहे. औरंगाबाद येथील मुलगा गेल्या चार महिन्यांपासून त्याची मावशी आरती सदावर्ते यांच्याकडे वास्तव्यास आहे.
आई-वडिलांच्या ताब्यातून सांभाळण्यासाठी आणलेल्या या मुलाचा संशयित दाम्पत्याकडून नेहमीच छळ होत होता. ही बाब शेजाऱ्यांच्या निदर्शनास आली होती. मात्र त्यावर कोणी भाष्य करण्यास तयार नव्हते. शुक्रवारी या दाम्पत्याने निर्दयीपणाचा कळस गाठल्याने परिसरातील नागरिकांनी धाव घेत थेट पोलीस आणि जिल्हा महिला व बालविकास अधिकारी कार्यालयाशी संपर्क साधल्याने ही घटना उघडकीस आली. संशयितांना ताब्यात घेतल्याचेही कळते.
