जळगाव (प्रतिनिधी) माजी मंत्री एकनाथराव खडसे यांच्याकडे कोट्यवधी रुपयांच्या बेहिशेबी मालमत्तेची चौकशीसाठी उच्च न्यायालयाचे न्यायाधीशांना आपण पत्र पाठविले नाही. कुणीतरी बनावट लेटरहेड तयार केल्याचे सांगत आ. भोळे यांनी २०१८ मध्ये गुन्हा दाखल केला होता. परंतू बीएचआर घोटाळ्यातील संशयित आरोपी सुरज झंवरच्या पुण्याच्या फ्लॅटमध्ये सापडलेले लेटरहेड बनावट असून ते आपले नसल्यामुळे तक्रार देण्याचा प्रश्नच येत नाही, अशी वेगळी भूमिका यावेळी आ. भोळे यांनी घेतल्यामुळे आश्चर्य व्यक्त केले जात आहे. दरम्यान, सलग दुसऱ्यांदा आ. भोळे यांचे कथित बनावट लेटरहेड संवेदनशील प्रकरणात वापरले गेल्यामुळे चर्चेला उधान आले आहे.
काय आहे प्रकरण
बीएचआर घोटाळ्यातील संशयित आरोपी सुरज झंवरच्या कार्यालयात सापडलेले आ. भोळे यांचे कोरे लेटरहेड सापडल्यानंतर प्रचंड खळबळ उडाली होती. धक्कादायक आमदार गिरीश महाजनांपाठोपाठ आता सुरेश भोळे यांचेही लेटरपॅड झंवरच्या कार्यालयात आढळून आल्यामुळे चर्चेला अधिक उधान आले आहे. सुरज झंवर याच्या पुण्यातील फ्लॅटमध्ये आठ पिशव्यांमध्ये शेकडो कागदपत्र मिळाले होते. यात जळगावचे आमदार सुरेश भोळे यांच्या नावाचे कोरे लेटरपॅडचा देखील समावेश आहे. याच बाबत भाजपा विधानसभा क्षेत्र प्रमुख दीपक साखरे यांनी खुलासा देत म्हटले होते की, जिथे सरकारी शिक्के बनावट बनू शकतात त्या ठिकाणी आमदारांचे बनावट लेटर पॅड बनवणे सहज शक्य आहे. तसेच बीएचआर प्रकरणाशी आ. भोळे यांचा कोणत्याही प्रकारे संबंध नाही. आ. भोळे हे बीएचआर पतपेढीचे ठेवीदार व कर्जदार सुद्धा नाहीत. बीएचआर प्रकरणाचा आ. राजूमामा भोळे यांच्याशी संबंध जोडणे म्हणजे सुता वरून स्वर्ग गाठण्यासारखे असल्याचेही श्री. साखरे यांनी म्हटले होते. तर सापडलेले लेटरहेड बनावट असून ते आपले नसल्यामुळे तक्रार देण्याचा प्रश्नच येत नाही, अशी भूमिका आ. भोळे यांनी घेतली आहे.
आ.भोळेंच्या लेटरहेडवरून खडसेंची बदनामी
दुसरीकडे याआधी २०१८ मध्ये देखील आमदार राजूमामा भोळे यांच्या लेटरहेडवरून मोठा गोंधळ निर्माण झाला होता. याचे पडसाद थेट विधिमंडळात देखील उमटले होते. माजी मंत्री एकनाथ खडसेयांच्याकडे कोट्यवधी रुपयांचा बेहिशेबी मालमत्ता आहे, त्याशिवाय कन्या रोहिणी खडसे-खेवलकर चेअरमन असलेल्या जिल्हा बॅँकेतून खडसे यांनी कोट्यवधीच्या नोटा बदल केल्या आहेत. याची सीबीआय चौकशीही करण्यात आली आहे, अशा आशयाची तक्रार २०१८ मध्ये आमदार सुरेश भोळे यांच्या लेटरहेडवर उच्च न्यायालयाच्या न्यायाधीशांकडे करण्यात आली होती. आपली बदनामी करण्याच्या हेतूने कोणीतरी हा प्रकार केल्याचे आमदार भोळे यांनी स्पष्ट केले होते. तसेच तत्कालीन पोलीस अधीक्षक दत्तात्रय कराळे यांच्याकडे लेखी तक्रार केल्यानंतर जिल्हापेठ पोलिस ठाण्यात गुन्हा दाखल करण्यात आला होता. यात तक्रारीत, आमदार भोळे यांच्या लेटरहेडसारखे बनावट लेटरहेड बनवून त्यात खडसे यांची बदनामी व्हावी म्हणून त्यांच्याकडे कोट्यवधीची बेनामी मालमत्ता आहे. त्यांच्या कन्या रोहिणी खडसे जिल्हा बँकेत चेअरमन असल्याने कोट्यवधीच्या नोटा बदल केल्याचे म्हटले आहे. हीच तक्रार बनावट लेटरपॅडवर उच्च न्यायालयच्या न्यायधिशाकडेही पाठविण्यात आली आहे. एकंदरीत आमदार भोळे व आमदार खडसे यांच्यात दुरावा होण्यासाठीच हा प्रकार झाल्याचेदेखील फिर्यादीत म्हटले होते.
काय म्हटले होते पत्रात
खडसे यांचा मूळ व्यवसाय शेती असूनही त्यांच्याकडे मोठ्या प्रमाणात बेहिशेबी मालमत्ता आहे. याबाबत समिती नेमून चौकशी करावी, अशी मागणी करणारे पत्र उच्च न्यायालयाचे न्यायाधीश व्ही. के. ताहिलरामानी यांच्याकडे पाठवण्यात आले होते. खडसेंच्या कन्या अध्यक्ष असलेल्या जिल्हा बँकेतून कोट्यवधी रुपयांच्या नोटा बदलण्यात आल्या. या प्रकरणाची सीबीआय चौकशी झाली असून ती दाबण्यात आली, असेही पत्रात म्हटले होते. विशेष म्हणजे आ.भोळे यांची हुबेहूब स्वाक्षरी त्या पत्रावर होती.
विधानसभेत पडसाद
याबाबत आमदार सुरेश भोळे यांनी जळगावच्या तत्कालीन पोलीस अधीक्षकांकडे तक्रारही केली होती. मात्र सुरेश भोळे यांनी स्वतः तक्रार दाखल करुनही पोलिसांनी गुन्हा दाखल करुन घेतला नाही. त्यामुळे विधानसभेत एकनाथराव खडसे चांगलेच संतापले होते. आ.सुरेश भोळे यांनी स्वतः याविरोधात तक्रार देऊनही पोलिसांनी अद्याप गुन्हा दाखल न केल्याने खडसेंनी सरकारचा चांगलाच समाचार घेतला होता.
गुन्हा दाखल करण्याचे आदेश
आमदारांनी तक्रार केल्यानंतरही पोलीस गुन्हा दाखल करून घेत नाहीत हे गंभीर आहे, असे म्हणत विधानसभा अध्यक्ष हरीभाऊ बागडे यांनी पोलीसांना गुन्हा दाखल करण्याचे आदेश दिले होते. एसपीला आत्ताच्या आत्ता फोन लावा, असे आदेश अध्यक्षांनी दिले होते. विधानसभा अध्यक्ष हरीभाऊ बागडे यांच्या आदेशानंतर संसदीय कामकाज मंत्री गिरीष बापट यांनी बाहेर जाऊन जळगावच्या पोलीस अधीक्षकांना गुन्हा दाखल करुन घेण्यासाठी फोन केला होता. त्यानंतर जळगाव जिल्हापेठ पोलिसांत गुन्हा दाखल करण्यात आला होता.
आ.भोळे यांनी काय म्हटले होते फिर्यादीत
यात तक्रारीत, आमदार भोळे यांच्या लेटरहेडसारखे बनावट लेटरहेड बनवून त्यात खडसे यांची बदनामी व्हावी म्हणून त्यांच्याकडे कोट्यवधीची बेनामी मालमत्ता आहे. त्यांच्या कन्या रोहिणी खडसे जिल्हा बँकेत चेअरमन असल्याने कोट्यवधीच्या नोटा बदल केल्याचे म्हटले होते. एकंदरीत खडसेंना बदनाम करण्याचा हा डाव असल्याचा दावा सुरेश भोळे यांनी केला होता. तर माझ्यात व आमदार खडसे यांच्यात दुरावा होण्यासाठीच हा प्रकार झाल्याचेदेखील फिर्यादीत आ. भोळे यांनी म्हटले होते.
खडसेंच्या वेळी तक्रार…झंवरच्या वेळी माघार का?
बीएचआर घोटाळ्यातील संशयित आरोपी सुरज झंवरच्या पुण्याच्या फ्लॅटमध्ये सापडलेले आ. राजूमामा भोळे यांचे लेटरहेड बनावट असल्याचा दावा भाजपा विधानसभा क्षेत्र प्रमुख दीपक साखरे यांनी केला होता. श्री. साखरे यांचा दावा खरा असेल तर विधीमंडळ सदस्याचे बनावट लेटरहेड बनविण्या सारख्या गंभीर प्रकरणी खुलाशाऐवजी पोलिसात तक्रार का नाही?, असा प्रश्न उपस्थित झाला होता. खडसे यांच्या प्रकरणात आ. भोळे यांनी तात्काळ तत्कालीन पोलीस अधीक्षकांची भेट घेवून तक्रार दिली होती. मग झंवरच्या प्रकरणातही लेटरहेड बनावट असल्याचे माहित असूनही ते तक्रार का देत नाहीय? असा प्रश्न उपस्थित होत आहे. विशेष म्हणजे हा मुद्दा भविष्यात आपल्याला अडचणीत आणू शकतो, हे माहित असूनही तक्रार देण्यापासून आ. भोळे हे माघार का घेत आहेत?,हा प्रश्न अनेकांना पडला आहे. दरम्यान, खडसे यांच्या प्रकरणात भोळे यांना उच्च न्यायालयाच्या न्यायाधीश, मुख्यमंत्री देवेंद्र फडणवीस, प्रदेशाध्यक्ष रावसाहेब दानवे, पालकमंत्री चंद्रकांत पाटील यांच्याकडे पत्र पाठवून खुलासा करावा लागलाय.
