लखनऊ (वृत्तसंस्था) भाजपचे नेते, खासदार साक्षी महाराज यांनी एक वादग्रस्त विधान केलं आहे. साक्षी महाराज यांनी काँग्रेसवर अत्यंत गंभीर आरोप लावला आहे. काँग्रेसनेच नेताजी सुभाषचंद्र बोस यांची हत्या घडवून आणली होती, असा आरोप साक्षी महाराज यांनी केला आहे. त्यामुळे राजकीय वर्तुळात एकच खळबळ उडाली आहे. एका सभेला संबोधित करत असताना साक्षी महाराज यांनी हे वक्तव्य केले आहे.
एका जनसभेला संबोधित करताना साक्षी महाराजांनी हा खळबळजनक आणि वादग्रस्त आरोप केला आहे. ‘काँग्रेसनेच अवेळी सुभाषचंद्र बोस यांना मृत्यूच्या दाढेत ढकलेल होते. माझा आरोप आहे की, काँग्रेसनेच सुभाषचंद्र बोस यांची हत्या केली आहे. हे फक्त त्यांच्या लोकप्रियतेमुळे करण्यात आले. सुभाषचंद्र बोस यांच्या लोकप्रियतेपुढे पंडित नेहरू आणि महात्मा गांधीही फिके पडत होते.’ असे साक्षी महाराज म्हणाले आहेत. शनिवारी देशभरात नेताजी सुभाषचंद्र बोस यांची १२५वी जयंती उत्साहात साजरी करण्यात आली. या दरम्यान साक्षी महाराजांनी हे विधान केले आहे. यामुळे राजकीय वर्तुळात खळबळ उडाली आहे. रक्त सांडवून आपण स्वातंत्र मिळवले आहे. स्वातंत्र मिळवणे सोपे नव्हते. त्यासाठी सुभाषबाबूंना तुम मुझे खून दो मै तुम्हे आझादी दुँगाचा नारा द्यावा लागला.
सुभाषचंद्र बोस यांचा मृत्यू १८ ऑगस्ट १९४५ रोजी तैवानला जाताना विमान दुर्घटनेत झाला. मात्र, त्यांच्या मृत्यूवरून अनेक दावे-प्रतिदावे करण्यात येत आहेत. २०१७मध्ये केंद्र सरकारने आरटीआयच्या माध्यमातून दिलेल्या माहितीनुसार सुभाषचंद्र बोस यांचा मृत्यू विमान दुर्घटनेत झाला आहे. तरीही सुभाषबाबूंच्या मृत्यूवरून अनेक शंका व्यक्त केल्या जातात.
