यश मिळविण्यासाठी अभ्यासातील सातत्य महत्वाचे : विकास गिरासे

चोपडा (प्रतिनिधी) येथील महात्मा गांधी शिक्षण मंडळ संचलित कला शास्त्र व वाणिज्य महाविद्यालयातील करिअर कट्टा, स्पर्धा परीक्षा मार्गदर्शन केंद्र तसेच द युनिक अकॅडमी जळगाव यांच्या संयुक्त विद्यमाने ‘स्पर्धा परीक्षा मार्गदर्शन कार्यशाळेचे’ आयोजन करण्यात आले होते. या कार्यशाळेचे उदघाटन मान्यवरांच्या हस्ते दीपप्रज्वलन व सरस्वती पूजन करून करण्यात आले.

या कार्यक्रमाचे अध्यक्ष म्हणून महाविद्यालयाचे उपप्राचार्य एन. एस. कोल्हे हे उपस्थित होते. या कार्यक्रमाप्रसंगी विकास गिरासे (शाखाधिकारी, द युनिक अकेडमी, जळगाव), नरेंद्र पाटील (समन्वयक, द युनिक अकेडमी, जळगाव), डी. पी. सपकाळे, डी. एस. पाटील (समन्वयक, अंतर्गत गुणवत्ता हमी कक्ष), डॉ. आर.आर. पाटील, करिअर कट्टाचे समन्वयक वाय. एन. पाटील आदि मान्यवर व्यासपीठावर उपस्थित होते. या कार्यक्रमाचे प्रास्ताविक व पाहुण्यांचा परिचय करून देतांना करिअर कट्टाचे समन्वयक वाय. एन. पाटील म्हणाले की, ‘विद्यार्थ्यांना करिअर घडवितांना येणाऱ्या अडचणी दूर होऊन योग्य दिशा मिळावी व मार्गदर्शन मिळावे हा उद्देश कार्यशाळा आयोजनामागे आहे. यशस्वी होण्यासाठी विद्यार्थ्यांनी ध्येय निश्चित करावे’.

यावेळी ‘स्पर्धा परीक्षांची तयारी कशी करावी’? या विषयावर मार्गदर्शन करतांना विकास गिरासे म्हणाले की, ‘विद्यार्थ्यांनी अभ्यासाचे नियोजन करून वेळेचे भान ठेवून स्पर्धा परीक्षेची तयारी सुरु करावी. अभ्यासात सातत्य असले तर यश मिळविण्यासाठी मदत होईल. स्पर्धा परीक्षेची तयारी करतांना विद्यार्थ्यांनी चिकित्सक बुद्धीने विचार करणे गरजेचे आहे.निर्णय क्षमता व समस्या निवारण करण्याची प्रवृत्ती हवी.पुरोगामी व प्रतिगामी पद्धतीने अभ्यास करून विचार प्रगत करावे. अभ्यासक्रम ओळख, मागील प्रश्नपत्रिकांची उजळणी, संदर्भ पुस्तकांचे वाचन, लोकसत्ता वर्तमानपत्र वाचन, प्रश्नांचा सराव या मार्गाने गेल्यास यश संपादन करता येईल.’ यावेळी त्यांनी विद्यार्थ्यांच्या प्रश्नांना समाधानकारक उत्तरे देऊन शंकांचे निरसन केले.

मनोगत व्यक्त करतांना डी. एस. पाटील म्हणाले की, ‘नियोजनबद्ध अभ्यास, विषयाची निवड, विषय आकलन, उपलब्ध संदर्भ ग्रंथ, आपला कल या गोष्टी ओळखून स्पर्धा परीक्षेची तयारी करावी.’ या कार्यक्रमाचे सूत्रसंचालन डॉ. आर.आर.पाटील यांनी केले तर आभार डी.एस.पाटील यांनी मानले. या कार्यक्रमाच्या यशस्वीसाठी डॉ.एम.एल.भुसारे, डी. डी. कर्दपवार, एम. ए. पाटील, एम. बी. पाटील, डॉ. एच. जी.सदाफुले, ए. एच. साळुंखे, डॉ. पी. एन.सौदागर, स्नेहा राजपूत, बी. एच. देवरे, एस. जी. पाटील, एस. एन. पाटील यांनी परिश्रम घेतले. या कार्यक्रमाप्रसंगी स्पर्धा परीक्षेची तयारी करणारे बहुसंख्य विद्यार्थी तसेच शिक्षक-शिक्षकेत्तर कर्मचारी उपस्थित होते.