नवी दिल्ली (वृत्तसंस्था) ब्रिटनमधून आता जगभरात फैलावत असलेला कोरोनाचा नवा स्ट्रेन अधिक धोकादायक असल्याचे भारतीय आयुर्विज्ञान संस्थेचे (एम्स) संचालक डॉ. रणदीप गुलेरिया यांनी स्पष्ट केले आहे. ब्रिटनहून भारतात परतलेल्या प्रवाशांपैकी सुमारे २० जणांना कोरोनाच्या नव्या प्रकाराची लागण झाल्याचे उघड झाल्यानंतर एम्सच्या संचालकांनी दिलेला हा सावधानतेचा इशारा भारताच्या चिंतेत भर टाकणारा ठरू शकतो, असे म्हटले जात आहे.
कोरोनाव्हायरसच्या नव्या स्ट्रेनबाबत एम्सचे संचालक रणदीप गुलेरिया यांनी सांगितलं की, “प्री-एपिडिमोलॉजिकल डेटा मधून समजलं आहे की, कोरोनाव्हायरसने अनेक ठिकाणी आपलं स्वरुप बदललं आहे. ब्रिटनमध्ये आढळलेल्या कोरोनाच्या नव्या स्ट्रेनबाबत सर्वाधिक चिंतेची बाब म्हणजे तो अतिशय संसर्गजन्स असून वेगाने पसरतो.” ब्रिटनमध्ये सापडलेला कोरोनाचा नवा स्ट्रेन भारतात नोव्हेंबर किंवा डिसेंबरच्या सुरुवातीलाच आला असण्याची शक्यता आहे. पण भारतात मागील काही आठवड्यात कोरोनाबाधितांच्या संख्येत फारशी वाढ झालेली नाही. कोरोनाचा नवा स्ट्रेन भारतातील रुग्ण आणि आरोग्य यंत्रणांवर परिणाम करु शकतो. त्यामुळे आपल्याला जास्त खबरदारी घेणं गरजेचं आहे, जेणेकरुन याच्या प्रादुर्भावाला आळा बसेल, असं रणदीप गुलेरिया यांनी सांगितलं. केंद्र सरकारने युरोपातून येणारी विमान तात्पुरत्या स्वरुपात स्थगित केली आहेत. २५ नोव्हेंबर पासून २३ डिसेंबरपर्यंत एकूण ३३ हजार नागरिक युकेहून भारतातील विविध विमानतळावर उतरले आहेत. त्यापैकी ११४ जण कोरोना पॉझिटिव्ह असल्याचं समोर आलं आहे. त्यांचे नमुने जीनोम सिक्वेन्सिंगसाठी भारताच्या विविध दहा प्रयोगशाळांमध्ये पाठवले होते. त्याच्या अहवालानंतर सहा जणांमध्ये कोरोनाव्हायरसचा नवा स्ट्रेन आढळला आहे. कोरोनाचा नवा स्ट्रेन आढळणाऱ्यांची संख्या वाढली असून २० पेक्षा जास्त जण बाधित आहेत. त्यांना विलगीकरण कक्षात ठेवलं आहे.
दरम्यान, देशात ब्रिटनमध्ये आढळलेल्या नव्या कोरोनाची लागण झालेल्या रुग्णांची संख्या २० वर पोहोचली आहे. अद्यापही अनेक प्रवाशांचा शोध देशभरात सुरू असून, कोरोनाच्या नव्या स्ट्रेनचे नमुने देशभरातील १० प्रयोगशाळांमध्ये तपासले जात असल्याची माहिती मिळाली आहे.
