धरणगाव (प्रतिनिधी) सुमारे ११ लाख रुपये घेऊन जाणाऱ्या एरंडोल तालुक्यातील फरकांडे येथील कापूस व्यापाऱ्याची पाळधी पेट्रोल पंपाजवळ चौघांनी चाकूने भोसकून खून केला होता. याप्रकरणी पोलिसांनी तपासचक्र फिरवायला सुरुवात केली असून व्यापाऱ्याने जेथून हवालाची रक्कम उचलली त्या परिसरासह इतर ठिकाणचे सीसीटीव्ही फुटेज ताब्यात घेतले आहेत. एवढेच नव्हे तर लुटपाटसह वैयक्तिक कारणांच्या अॅगलनेही पोलिसांचा तपास सुरु केला आहे.
जाणून घ्या घटनेचा थरार
जळगाव येथून हवाल्याचे सुमारे १५ लाख रुपये घेऊन जाणाऱ्या एरंडोल तालुक्यातील फरकांडे येथील कापूस व्यापारी स्वप्नील शिंपी यांची कार पाळधी पेट्रोल पंपाजवळ शुक्रवारी रात्री ८ वाजेच्या सुमारास तीन दुचाकीवर आलेल्या चौघांनी अडवली. दुचाकीस्वाराला त्यांच्या कारने उडवल्याचा बहाणा करून पैशांची बॅग हिसकावून नेण्याचा प्रयत्न केला. व्यापाऱ्याने पैशांच्या बॅगेवरील स्वत:ची पकड सैल होऊ न दिल्यानंतर हल्लेखोरांनी त्यांच्या मांडीवर, पोटावर चाकूने वार केले. तशाही अवस्थेत व्यापाऱ्याने महामार्गावर जोरात पळत बचावाचा प्रयत्न केला. व्यापाऱ्यासह त्याच्यासोबतच्या कामगाराने प्रतिकार केल्यानंतर हल्लेखोर पैशांची बॅग सोडून पळून गेले. जखमी व्यापाऱ्याला तातडीने रुग्णवाहिकेत खासगी रुग्णालयात दाखल केल्यानंतर डॉक्टरांनी मृत घोषित केले.
अनेक सीसीटीव्ही फुटेज ताब्यात
खून झाल्याची घटना समोर आल्यानंतर पोलिसांनी तात्काळ तपासचक्र फिरवायला सुरुवात केली आहे. त्यानुसार पोलिसांनी पाळधीसह जळगाव येथील अनेक सीसीटीव्ही फुटेज ताब्यात घेतली आहेत. अगदी हवालाची रक्कम उचलली त्या परिसरातील देखील सीसीटीव्ही फुटेज घेतले ताब्यात आहेत. तत्पूर्वी आज धरणगाव पोलिसांनी घटनास्थळ जात पंचानामा केला. तसेच घटनेचे प्रत्यक्षदर्शी दिलीप राजू चौधरी यांच्याकडून सर्व घटना समजून घेतली.
लुटपाटसह वैयक्तिक कारणांच्या अॅगलनेही पोलिसांचा तपास सुरु
चार हल्लेखोरांनी हल्ला केला. एकाला चाकूने भोसकले. परंतू रक्कम सुरक्षित राहिली. त्यामुळे या हल्ल्यामागे फक्त लुटपाटचा मुख्य उद्देश होता की, अन्य काही कारणे होती?, या दृष्टीने देखील पोलिसांनी तपास सुरु केला. हल्लेखोरांचा स्वप्नील शिंपी यांच्यासोबत व्यावसायिक, वैयक्तिक काही दुष्मनी होती का?, या दिशेने देखील पोलीस तपास करत आहेत. पोलिसांची काही पथके काल रात्रीपासूनच पाळधी, धरणगाव, फारकांडे, जळगाव अशा विविध भागात हल्लेखोरांचा शोध घेत आहेत.
