जळगाव (प्रतिनिधी) फटाके फोडण्याच्या कारणावरुन दांम्पत्याला चौघांनी शिवीगावळ करीत बेदम मारहाण केली. त्यानंतर धारदार चॉपरने दांपत्याच्या चेहऱ्यावर वार करीत त्यांना गंभीर जखमी केले. ही घटना शिरसोलीतील पाण्याच्या टाकीजवळ घडली. याप्रकरणी एमआयडीसी पोलीस स्टेशनला गुन्हा दाखल करण्यात आला आहे.
जळगाव तालुक्यातील शिरसोली येथे छाया मुकेश पाटील (वय २९) या वास्तव्यास आहे. दि. २१ रोजी रात्री ९ वाजेच्या सुमारास फटाके फोडण्याच्या कारणावरून त्यांच्या घरासमोर संशयित आरोपी ज्ञानेश्वर युवराज पाटील, खुशाल माना बारी, बापू मिस्तरी, अमोल बंडू पवार (सर्व रा. शिरसोली) यांनी महिलेचे पती मुकेश अशोक पाटील (वय ३४) यांना जबर मारहाण करून शिवीगाळ करत जीवे ठार मारण्याची धमकी दिली. तसेच कैलास मिस्त्री याने त्याच्या हातातील धारदार चॉपरने चेहऱ्यावर मारून चेहऱ्याचे विद्रुपीकरण केले. छाया पाटील भांडण सोडवण्यास आले असता त्यांनाही संशयित आरोपींनी मारहाण करून शिवीगाळ केली.
भांडण सोडविण्यांवर केला हल्ला
तसेच छाया पाटील यांच्या उजव्या हाताच्या पंजाजवळ हत्याराने मारून दुखापत केली. भांडण सोडवण्यास आलेले गोरक्ष शरद पाटील यांच्या डाव्या मांडीवर मागच्या बाजूला तर गगन माधव चव्हाण यांच्या डाव्या हाताला संशयित आरोपींनी धारदार शस्त्राने मारून दुखापत केली आहे. याप्रकरणी गुन्हा दाखल करण्यात आला आहे. तपास उपनिरीक्षक राजेंद्र उगले करीत आहेत.
