मुंबई (वृत्तसंस्था) गेले काही महिने फरार असलेले मुंबईचे माजी पोलिस आयुक्त परमबीर सिंग यांच्याविरोधात मुंबईच्या अतिरिक्त मुख्य महानगर दंडाधिकारी कोर्टाने अजामीनपात्र वॉरंट जारी केले आहे.
गुरुवारी ठाणे न्यायालयाने परमबीर सिंग यांच्याविरोधात अजामीनपात्र वॉरंट जारी केले होते. तसेच बुधवारी महाराष्ट्र सरकारने परमबीर सिंग यांच्या विरोधात कठोर पावले उचलत त्यांचा पगार रोखण्याचा निर्णय घेतला. वसुली प्रकरणातील आरोपी असलेले परमबीर सिंग हे आयपीसीच्या अनेक कलमांअंतर्गत आरोपी आहेत आणि हे लक्षात घेत आरोपीला अटक करून कोर्टात हजर करावे, असे निर्देश न्यायालयाने पोलिसांना दिले आहेत.
मुंबईचे माजी पोलिस आयुक्त परमबीर सिंग यांना अँटिलिया स्फोटके प्रकरणी आरोपी करण्यात आले होते. यानंतर परमबीर सिंग रजेवर गेले होते. मात्र तेव्हा पासूनच ते बेपत्ता आहेत. महाराष्ट्र सरकार परमबीर सिंगचा शोध घेत आहे. त्यासाठी राज्य सरकार अनेक प्रकारे प्रयत्न करत आहे. याशिवाय मुंबईच्या माजी पोलिस आयुक्तांना फरार घोषित करण्याचाही महाराष्ट्र सरकारचा प्रयत्न आहे.
