बोदवड (प्रतिनिधी) विवाहितेस मुलबाळ होत नसल्याच्या कारणाने मानसिक व शारीरिक छळ करून क्रूर वागणूक देऊन आत्महत्येस प्रवृत्त केल्याप्रकरणी पती, चुलत सासरा व चुलत सासू यांचेविरुद्ध बोदवड पोलीस ठाण्यात गुन्हा दाखल करण्यात आला आहे.
यासंदर्भात अधिक असे की, गोरक्षनाथ नगर मधील रहिवासी भावना निलेश महाजन (वय २७) हिने राहत्या घरी गळफास घेऊन आत्महत्या केली होती. सदर महिलेच्या मृतदेहाचे शवविच्छेदन तिच्या माहेरच्या नातलगांनी जळगाव येथे करण्याचा आग्रह धरल्याने सदर महिलेचा मृतदेह जळगाव जिल्हा रुग्णालयात पाठवण्यात आला होता. या प्रकरणी मयत महिलेचा भाऊ भूषण अशोक माळी (रा. आसोदा) याने बहिणीस मुलबाळ होत नसल्याचे कारणाने मानसिक व शारीरिक छळ करून क्रूर वागणूक देऊन आत्महत्येस प्रवृत्त केले अशी फिर्याद दिल्याने मयत महिलेचा पती निलेश सुभाष महाजन, चुलत सासरा प्रकाश दौलत महाजन व चुलत सासू मंगला प्रकाश महाजन यांचे यांचे विरुद्ध बोदवड पोलीस ठाण्यात भा. द. वि. क.३०६,४९८अ,३४ प्रमाणे गुन्हा दाखल केला असून पोलिसांनी मयत महिलेचा पती निलेश यास अटक केली आहे. यप्रकरणी पोलीस निरीक्षक राजेंद्र गुंजाळ यांचे मार्गदर्शनाखाली पोलीस उप निरीक्षक शरद माळी हे तपास करीत आहेत.
