नवी दिल्ली (वृत्तसंस्था) हरियाणा, पंजाबमधल्या शेतकऱ्यांनी केंद्र सरकारच्या कृषीनीतीविरोधात चलो दिल्ली आंदोलन तीव्र केलं आहे. त्यामुळे दिल्लीच्या सर्व सीमांना आज लष्करी छावणीचं स्वरुप प्राप्त झालं होतं. बुधवारी रात्री उशिरापर्यंत शेतकरी हरयाणा सीमेवर ठाण मांडून राहिले. आजदेखील शेतकऱ्यांकडून दिल्लीत दाखल होण्यासाठी प्रयत्न केले जात आहेत. रोहतकमध्ये ‘दिल्ली चलो’ आंदोलनासाठी एकत्र जमलेले शेतकरी झज्जर सीमेवर गोळा झाले आहेत.
कडाक्याच्या थंडीत पाण्याचे फवारे मारले जात होते. कुठे अश्रुधुराच्या नळकांड्या फोडल्या जाता होत्या तर कुठे सीमेवर असावा तसा कडेकोट पहारा होता. ही सगळी तयारी कुठल्या अतिरेक्यांसाठी नाही तर ही शेतकऱ्यांचं आंदोलन रोखण्याची तयारी होती. कारण आता ते दिल्लीच्या दिशेनं निघाले आहेत. केंद्र सरकारनं नुकतेच मंजूर केलेले शेतकरी कायदे तातडीनं मागे घ्यावेत ही प्रमुख मागणी करत हे शेतकरी एकत्र आले आहेत. इतके दिवस आंदोलन पंजाब, हरियाणापुरतं मर्यादित होतं. पण आता शेतकऱ्यांनी आपला मोर्चा दिल्लीकडे वळवला आहे. दिल्लीकडे कूच करणाऱ्यांमध्ये पंजाब, हरियाणा, उत्तर प्रदेश, उत्तराखंड, राजस्थान आणि केरळच्या शेतकऱ्यांचा; तसेच पाचशे शेतकरी संघटनांचा समावेश असून ते शुक्रवारी दिल्लीत आंदोलन करणार आहेत. या तिन्ही कायद्यांचा विरोध करण्यासाठी शेतकरी दोन महिन्यांपासून रस्त्यावर उतरले आहेत. पंतप्रधान नरेंद्र मोदी यांनी खंडन केल्यानंतरही सरकार हमी भाव संपुष्टात आणेल, अशा शंकेने शेतकरी आक्रमक झाले आहेत. कृषी कायद्यांविरुद्ध राजधानी दिल्लीवर मोर्चा काढून चाल करून येणाऱ्या शेतकऱ्यांना पांगविण्यासाठी हरियाणा पोलिसांनी अंबालाजवळ पाण्याचे फवारे मारले आणि अश्रुधूराचा वापर केला. शेतकऱ्यांनीही मोर्चा रोखण्यासाठी लावलेले संरक्षण कठडे उचलून घग्घर नदीत फेकून दिले आणि दगडफेक केली.
शेतकऱ्यांना रोखण्यासाठी दिल्ली-हरियाणा सीमेवर पाच हजार पोलिस, तसेच केंद्रीय राखीव पोलिस दलाच्या तुकड्या तैनात करण्यात आल्या आहेत. सीमा सील करून आठ जागांवर नाकेबंदी केली आहे. सावधतेचा उपाय म्हणून दिल्ली आणि शेजारच्या शहरांमधील मेट्रो सेवाही दुपारी दोन वाजेपर्यंत बंद करण्यात आली होती. शेतकऱ्यांना हरियाणामध्ये शिरू देणार नाही, अशी घोषणा करून हरियाणा सरकारने दिल्ली-चंडीगड महामार्ग बंद केला असून, गुडगाव आणि फरीदाबादचे दिल्लीकडे जाणारे रस्ते, तसेच उत्तर प्रदेश-दिल्ली सीमेवरील रस्ते बंद केले आहेत.
