मुंबई (वृत्तसंस्था) आमदार नितीन देशमुखांचा मी स्वतःची सुटका करून पळून आलो हा दावा खोटा असल्याचं शिंदे गटाचं म्हणणं आहे. शिंदे समर्थकांनी आमदारांचे फोटो व्हायरल करत नितिन देशमुख यांचा दावा मोडून काढला आहे. तसेच देशमुख यांना स्पेशल चार्टर विमानाने नागपूरला पोहोचवण्यात आल्याचं या गटाकडून स्पष्ट करण्यात आलं. त्यामुळे शिवसेनेच्या गोटात पुन्हा खळबळ उडाली आहे.
अकोला जिल्ह्यातील शिवसेनेचे बाळापूरचे आमदार नितीन देशमुख यांनी एकनाथ शिंदे गटावर आणि भाजपवर काही आरोप केले होते. गुजरात पोलिसांनी हॉस्पिटलमध्ये नेऊन जबरदस्तीने इंजेक्शन टोचलं. माझा घात करण्याचा प्रयत्न होता असा आरोप त्यांनी राज्यात परत आल्यावर केला होता. नितीन देशमुखांनी केलेला हा आरोप आता खोटा असल्याचं एकनाथ शिंदे गटाकडून सांगण्यात आलं. नितिन देशमुख यांचा गुवाहाटी ते अकोला हा परतीचा प्रवास खाजगी विमानाने झाला. एकनाथ शिंदेंच्या शिलेदारांनी सन्मानाने त्यांना अकोल्याला पोहोचवले असल्याचं सांगण्यात येत असून त्याची छायाचित्रे सोशल मीडियावर टाकण्यात आली आहेत. नितीन देशमुखांच्या सोबत दोन कार्यकर्ते दिले असल्याची माहितीही शिंदे गटाकडून करण्यात आली.
बंडखोरी करणाऱ्या एकनाथ शिंदे यांच्या 40 हून अधिक आमदारांचा मुक्काम सूरतमधील हॉटेलमध्ये होता. या आमदारांसोबत बाळापूरचे आमदार नितीन देशमुख यांचाही समावेश होता. परंतु काही शिवसेना आमदारांना जबरदस्तीने, मारुन मुटकून सूरतला नेल्याचा दावा शिवसेनेतर्फे करण्यात आला होता. शिवाय नितीन देशमुख यांचा फोन नॉट रिचेबल आल्याने त्यांच्या पत्नीने पोलिसात तक्रार दाखल केली होती. त्यामुळे नितीन देशमुख यांच्याबाबत नेमकं काय घडलं याची चर्चा सुरु झाली. अखेर नागपुरात परतल्यानंतर त्यांनी आपण कशी सुटका करुन परतलो याची माहिती माध्यमांना सांगितली होती.
